Brigada Balaod

Buot motungha og abogasiya

Dear Atty. V,

Idol gyod ta kaayo ka. Maayo untag mobalik kag tingog sa radyo kay nalupig nas pikas planeta ang imo kanhi programa sa planeta nga imo gitinggan. Anyway, dili ni kabahin sa puntong legal ako pangutana, Atty. V. Gusto unta ko mangayo og advice nimo kon angayan ba kong moeskwela og abogasiya. Dili ba kaha dako kaayo og gasto? Akong gitan-aw-tan-aw ang mga law schools diri sa Cebu, morag madala ra nako ang budget sa tuition. Apan kamahal man sa mga libro sa law karon, ug tan-aw nako dili gyod madala sa ako budget. Mahimo ra ba nga moeskwela og law bisag walay palit-palit og libro? Si Roger ni.

*****

Dear Roger,

Actually, ang angay nimo ipangutana sa imong kaugalingon, dili nga kon maka-afford ba ka pagpalit og mga libro samtang nag-eskwela ka sa abogasiya, kon dili kon may oras ka ba pagbasa sa maong mga libro. Ang mga textbook god nga naa sa merkado designed nga comprehensive ang scope. Sa akong sabot nimo, nagtrabaho ka ug busa mokaon gyod na sa oras ang imong pagtrabaho, gawas na lamang kon mag-full time student ka. Way gamit kon magpalit kag libro unya dili ra gihapon nimo mabasa. Sa dihang nagtungha ko og abogasiya, sa unang duha ka semestre kompleto pod ko sa libro. Apan pagka-second year nako dili na gyod maapas og basa ang mga libro. Gani naa pa koy mga libro sa second semester sa first year nako nga wala gyod nako mabasa.

Laing negative sa libro sa abogasiya, labi na sa criminal ug political law, mao nga paspas kaayo ang kausaban sa maong mga natad. Gani, sa pagsulat niini, gipagawas na ni Judge Marlo Campanilla ang 2021 nga edition sa iyang Revised Penal Code Book One – mao pa gali pag-abot sa 2020 nga edition dinhi sa Cebu. Sa ato pa, by the time nga mo-take ka sa bar four or five years sukad pagpa-enrol nimo, nagkinahanglan na pod ka og bag-ong version sa libro.

Kon walay libro, unsa may angay gamiton? Sagad sa mga law school dunay ilang kaugalingong “reviewers”. Gani may mga law school nga may mga reviewer nga geared ngadto kon kinsay nagtudlo sa maong subject. Sa ato pa, ang pasunod sa mga topics diha sa review pinasubay na sa kaugalingong kompas sa professor. Sagad aning mga reviewer, tungod kay ginama sa mga estudyante, gasto lamang sa photocopy ang imong angay bayran.

Hinuon sa dili pa ka mo-bar, mas maayo nga mopalit ka sa mga latest nga libro aron maka-review ka ug unsa nay nangausab, ingon man pag-brush up sa mga topic nga basig gipaspas ra og discuss sa inyong professor.

Dayona kanang imong damgo and see you in court soon.

Hinaot nakatabang kini kanimo.

– Atty. V

P.S. As of now wa pa koy plano mobalik sa radyo tungod kay dili sama sa mantalaan nga mahimo nakong i-submit ang akong article basta lang dili maabtan sa deadline, ang radyo kinahanglan gyod og block of time.

P.S.S. Ang kaon actually ang mas dako nimog gasto kon moeskwela kag law. Sigehon lang kag gutom.

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog. Walay bayad ang pagtubag sa inyong mga pangutana. Kanunaya lamang ang pagpalit sa atong Brigada Newspaper.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.