Brigada Balaod

Gipapha sa trabaho aron patas

Dear Atty. V,

Tawga lang ko sa ngalan nga Erwin. Nag-security guard ko sa usa sa mga lungsod sa lalawigan sa Sugbo ayawat nga makatabang sa panginabuhian. Giantos nako ang tag PHP 300.00 ang adlaw, 12 oras ang duty kay lagi lisod ning kabos ta. Niadtong gabii sa Disyembre 24 padung sa Pasko, Atty. V, akoy nag-duty unya mobiya ko sa Disyembre 25 alas siyete sa buntag. Pag-abot sa ako ka-relibo hubog siya. Ako giingnan nga dili mahimo nga mo-relibo siya nako nga hubog siya kay kami tanan ang madaot. Nga ako usa tawgan ang inspector unsay buhaton. Naunsa ba nga iya man hinuon kong gisumbag mao to nga nagpaalarma ko sa mga pulis. Buot gyod unta ko nga mokiha niya Atty. V apan mihangyo ang inspector nga dili na lang kay kami tanan madaot kay wala mi lisensya isip security agency. Mao tong wala na lang ko mokiha niya. Gitangtang siya Atty. Apan naunsa ba nga pag-duty nako karon lang, Disyembre 30 sa alas 7 sa gabii, giingnan man ko sa inspector nga last nga duty na lang nako, ug ila na kong tangtangon aron patas. Pwede diay na Atty.? Kon moreklamo ko asa man? Dako ba sab ko og magasto? Daghan kaayong salamat.

*****

Dear Erwin,

Kon kita nagtrabaho, duna lamay pipila ka rason sumala sa balaod nga mahimong rason nga tangtangon ta validly. Sa akong tan-aw sa imong sitwasyon, walay balido nga rason ang imong agency pagtangtang kanimo, kay tukma ra man pod tong manawag ka og pulis tungod sa alarma kay gisukmag ka sa imong ka-relibo. Gani ila mang gitangtang ang imong ka-relibo tungod sa maong panghitabo.

Dili mahimo ang ilang rason nga tangtangon lang sab ka aron patas, kay wala man kay sala atong hitaboa.

Usa pa, kon tangtangon ka nila, kinahanglan sab nila sundon ang gitawag og twin-notice rule: notice pagpahibalo kanimo sa ilang intensyon nga tangtangon ka, ug notice pagpahibalo sa pagtangtang gayod kanimo. Kini wala usab nila sunda.

Mahimo kang modangop sa Regional Arbitration Branch (RAB) sa National Labor Relations Commission (NLRC) aron matabangan ka. Walay bayad ang pagpadangat og kaso sa maong buhatan. May mga abogado usab nga mahimo nimong duolon nga contingency o sa ato pa mokuha lang og portion kon duna man gali daog.

Hinaot nakatabang kini kanimo.

– Atty. V

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog. Walay bayad ang pagtubag sa inyong mga pangutana. Kanunaya lamang ang pagpalit sa atong Brigada Newspaper.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.