Brigada Balaod

Anak wa marehistro sa apelyido sa amahan

Dear Atty. V,

Ako diay si Michelle _____________, taga-Balamban, Cebu. Aduna unta koy mga pangutana Atty. Hinaot nga imo kong matubag. Unang pangutana, ang akong anak nga kinamaguwangan narehistro apan wala magdala sa apelyido sa akong live in partner kay sa dihang akong gihimugso ang akong anak didto man sa Vicento Sotto ug dili man sila mosugot nga magdala sa apelyido sa amahan kay minor pa lagi kuno ko. Sixteen years old pa man god ko ato Atty. Unsaon man ni namo aron makadala sa apelyido sa amahan? Ikaduhang pangutana dili ba makadala ang among anak sa apelyido sa amahan tungod kay wala pa mi makasal ug minor pa ko? Ikatulong pangutana, ingon sa doktor nga nagpaanak nako nga kon makasal na unya mi mahimo daw nga makadala na sa apelyido sa amahan ang among anak pero mobalik daw mi didto sa Vicente Sotto kay andam silang mousab sa certificate of live birth. Ikaupat nga pangutana kinahanglan ba gyod diay adto usbon sa Vicente Sotto ang live birth sa among anak kay tungod didto siya natawo ug ngano man. Ikalima nga pangutana, kon amo na lang ipa-late register ang among anak ma-late register ba namo siya? Palihog tabangi ko, daghan kaayong salamat.

*****

Dear Michelle,

Sa una mong pangutana, aron makadala sa apelyido sa iyang amahan ang bata, moadto kamo sa Local Civil Registrar sa Cebu City diin siya gipanganak ug ikaw mo-execute nianang gitawag og Affidavit to Use Surname of the Father (AUSF) samtang ang imong live in partner mo-execute og admission of paternity nga naa sa luyo sa Certificate of Live Birth. (Dili tataw sa rules kon unsay mahitabo kon ang inahan minor pa, probably, mangita sa imong guardian kun ginikanan aron mo-assist sa imong sa pag-execute sa AUSF.)

Sa ikaduha mong pangutana, ang rason nga dili siya makadala sa apelyido sa amahan mao nga wala mo makasal sa iyang amahan ug wala ninyo sunda ang requirements sa maong sitwasyon.

Sa ikatulo ug ikaupat mong mga pangutana, ang pag-usab sa Certificate of Live Birth adto na himoon sa Local Civil Registrar sa Cebu City. Mao kini ang naa sa balaod.

Sa ikalima mong pangutana, ang pagpa-late register nagkinahanglan nga mo-execute ka og affidavit nga mag-attest nga wala pa siya marehistro. Apan tungod kay narehistro na man siya, perjury ang pag-execute sa maong affidavit. Usa pa, ang pagpa-late register maghatag lang unya hinuon og dugang kagubot.

Hinaot nakatabang kini kanimo.

– Atty. V

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog. Walay bayad ang pagtubag sa inyong mga pangutana. Kanunaya lamang ang pagpalit sa atong Brigada Newspaper.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.