Brigada Balaod

Under probation, nangulata og asawa

Dear Atty. V,

Mangutana lang unta ko kon makapyansa ba gihapon sa R.A. No. 9262 ang usa ka tawo nga under probation kay nadakpan sa drugas? Ang ako man gong bana, bisag gitabangan nako sa panahon nga nadakpan siya sa drugas aron maka-plea bargaining siya ug maka-probation mibalik man gihapon sa iyang batasan sa una nga mangulata nako. Dili na gyod ko kaantos Atty. Buot nakong ikiha ni siya og VAWC apan mahadlok ko kay makapyansa ra man gihapon siya. Daghang salamat.

*****

Dear Texter,

Ang physical injuries nga violence against women and their children (VAWC) bailable kay mao may giingon sa balaod. Sa ato pa, wala kay mahimo niana – makapyansa gayod siya. Dili man capital offense ang Section 5(a) ug 5(b) sa Republic Act No. 9262 busa bailable by right siya. Gawas na lamang kon mo-amount ngadto sa parricide o murder ang pagdapat sa babaye, bailable ang VAWC.

Hinuon kay nahisgotan man nimo nga under probation ang imong bana, ground for cancellation na sa iyang probation ang iyang pagpangdapat sa imo. Ang akong sugyot, dayona na og kiha. Unya pakigkitai ang probation officer niya aron ang maong probation officer ang mo-initiate og cancellation sa iyang probation didto sa korte diin gipahamtangan siya sa silot.

Hinaot nakatabang kini kanimo.

Sa uban natong magbabasa nga naa sa ingon niini nga sitwasyon, ayaw hulata nga mograbe pa ang pagpangabuso kaninyo. Dangon sa inyong Women and Children Protection Desk (WCPD) sa inyong police station karon dayon. O di ba kaha text sa atong numero aron mahatagan kamo og mapangayoan og tabang sa inyong area.

– Atty. V

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog. Walay bayad ang pagtubag sa inyong mga pangutana. Kanunaya lamang ang pagpalit sa atong Brigada Newspaper.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.