Brigada Balaod

Buot magpakasal ang girlfriend

Dear Atty. V,

Mangutana lang unta ko kon duna bay balaod sa Pilipinas nga makasohan ang usa ka tawo nga nakasaad na nga makigminyo apan iyang ipa-postpone tungod sa kalisod. Ang ako man gong pag-umangkon 21 anyos nakapamabdos sa iya girlfriend nga 19 anyos. Karon namalaye niadtong Hunyo ang ako igsoon (amahan sa ako pag-umangkon) ug ang akong sister-in-law. Gisabotan nga karong Disyembre ang kasal, kay nagtuo man ang akong igsoon nga mahuman na ang pandemic Hulyo o Agosto og makabalik na ang ilang gamayng karenderya. Apan kay last month ra man nakabalik Atty. ug dili na pod ingon ka kusog sa una. Karon mihangyo intawon ang ginikanan nga ioktaba lang usa next year ang kasal aron makatigom-tigom silag gamay. Karon may dili man mosugot ang nabayen-an. Miingon sila nga ikiha kuno nlla ang akong pag-umangkon ug ang iyang ginikanan. Unsay angay buhaton namo Atty.?

****

Dear Texter,

Walay gitawag nga breach of promise to marry dinhi sa atong nasod. Una sa tanan, wala gayoy criminal case niana.

Hinuon dunay mga kaso diin mi-award og damages ang Korte Suprema tungod kay wala modayon og pakasal ang lalaki. Ang komon nga ideya sa maong mga kaso mao nga nakapangandam na ang pikas partido. Nakapamalit na og gown pananglitan. O nakabayad na sa venue.

Sa akong tan-aw wala kini sa inyong sitwasyon, ug walay makaso ang nabayen-an sa imong pag-umangkon ingon man sa iyang mga ginikanan.

Hinaot nakatabang kini kanimo.

– Atty. V

**

I-text ang inyong mga pangutanang legal sa 0916-664-7624. Walay bayad ang among pagtubag.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.