Brigada Balaod

Gitampalo sa Mayor

Dear Atty. V,

Ako diay Benjamin. Ultimo ra gyod tawon ko Attorney. Way klarong trabaho. Ang kaning akong problema kabahin sa akong kaso batok ni Mayor _________ sa lungsod sa _______. Ingon ani man god Attorney, job order ko sa lungsod atong 2012. Unya kay nahaylo lagi ko sa inom sa mga barkada kay wa man gyod maanad og trabaho mao to nga nahubog ko og wala ko mabalik sa munisipyo human gipakuha ni Mayor og itik gikan sa alyado niyang kapitan kay ihawon unta nila sa compound. Gipatawag ko niya pagkaugma maong mi-report ko niya didto sa opisina niya sa munisipyo. Pwerte niyang sukoa ug iya gyod kong nakulatahan.

Gibayran kog dako sa iyang kaatbang sa politika aron ikiha siya. Mao tong mikiha gyod mi og milusot ang Information. Didto sa Sandiganbayan sa Manila ang hearing. Maayo tos una kay naa pa ang iyang atbang moplite nako ug mohatag pod og gamay nga allowance. Pero na-COVID man ang iyang atbang Attorney ug naa miy hearing karong October. Di man moplite ang Ombudsman sa akoa. Ako pa ra bay pangutan-on sa abogado sa mayor.

Ang akong mga pangutana Attorney mao kini: Nganong sa Manila man ang hearing nga physical injuries ra man to ang kaso unya diri nahitabo sa Cebu? Dili diay sa municipal trial court ra ni? Mao man goy ingon sa akong pag-umangkon nga 3rd year sa abogasiya. Unsa may mahitabo kon di na ko mopakita sa Sandiganbayan sa Manila? Pwede ba ko nila ipadakop? Kon moadto ko, makapangayo ba kog plite gikan sa Ombudsman?

Daghang salamat Attorney.

***

Dear Benjamin,

Wala ko kakita sa Information busa dili ko katarong og tubag nganong sa Sandiganbayan nalabay ang kaso. Probably, gi-characterize sa Ombudsman ang pagpangulata isip “in relation to office” maong nasulod sa Sandiganbayan. Dili pod ko kahatag og opinyon nganong wala gipa-quash sa iyang abogado ang Information didto sa Sandiganbayan; maglisod ko og justify unsaon pagka “in relation to office” sa physical injuries: dili apil sa trabaho sa mayor ang pagpangulata.

Ang presentation sa testigo iya prerogative sa prosecution. Theoretically, pwede gyod makapangayo og order para pugson ka sa pag-appear didto. Kon iisyu ba na sa korte is another question. Unlike sa akusado, walay katungod sa compulsory process ang reklamante. Sa simpol nga pagkasulti gamay kaayo og tsansa nga isyuhan kag warrant para mapugos kag adto.

Wala koy ideya kon may budget ba para plite sa mga testigo ang Ombudsman. Maayo tingali nga sila lay pangutan-on.

Hinaot nakatabang kini kanimo.

– Atty. V

**

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.