Brigada Balaod

Nangawat sa tindahan

Dear Atty. V,

Nalipay kaayo ko nga nabalik na ang inyo sirkulasyon. Kay duna unta koy pangutana Attorney. Niadto man gong wala pa mag GCQ pwerte gong lisora sa panahon kay di man ko kabalik sa Cebu City para magtrabaho. Tungod sa kagutom, natental ko pagpangawat sa tindahan sa among silingan. Mga de lata ug biskwet nga mikabat og 216.00 ang balor. Apan nasakpan ko mao tong gidala ko nila sa pulis. Gikulata pa gyod ko nila. Gipabuhian ra pod kos piskal pero padayon pa diay ang kaso. Mikiha kos barangay tungod sa pagpangulata pero giingnan kos kapitan nga maayo ra pong nakulatahan ko. Niadtong miaging bulan nag-hearing mi. Wala didto ang complainant pero miingon ang taga korte nga napahibalo siya. Giingnan ko sa PAO nga angkonon na lang. Mosukol unta ko pero mi-insist ang PAO. Mao to nga miangkon ko. Gipangutana ko sa huwes pilay makaya nako nga multa. Kay gipadalhan man kog 500 sa ako ig-agaw para ibayad sa abogado, miingon ko na naa koy 500 pero wa na koy ikabayad sa abogado kon ako to ibayad sa multa. Ok ra man diay dili bayaran ang PAO so gipabayad kog 500. Gipangutana sa huwes asa ang mga de lata ug ang biskwet. Miingon ang pulis nga giuli nila sa tag-iya sa tindahan pagkahumag picture kay mi-insist kuno ang tag-iya nga iuli. Naay acknowledgment receipt ang mga pulis.

Mao to miuli ko human sa hearing ug nakabayad ko og 500. Human sa pipila ka adlaw gipatawag ko sa barangay sa tag-iya sa tindahan kay pabayron ko og 5 mil sa iyaha. Pag-atubang namo didto pugson gyod ko niya pagbayad og 5 mil pero wa man koy ikabayad mao to giisyuhan siya og Certificate to File Action. Mokiha na pod kuno siya.

Ang akong mga pangutana Attorney mao kini: Makakiha pa ba ang tag-iya sa tindahan sa akoa nga wala may giingon ang korte? Ang katong pagkulata nila nako, makakiha pa ba ko?

Daghan kaayong salamat. Si Eduardo diay ko.

***

Dear Eduardo,

Sa akong opinyon, wala nay legal basis ang tag-iya sa tindahan nga mangolekta pa sa imoha. Una sa tanan wala man mawala sa iyaha ang imong gikawat, gali gipugos pa niya ang mga pulis og pagpauli niadto. Sa ato pa, walay actual loss alang kaniya.

Usa pa, iya man pod sala nganong wala siya miadto sa korte. Alangan na man ang korte maoy mo-adjust sa iya. Dili niya makwestyon ang korte nga mipadayon bisan wala siya. Besides, sa mga kasong kriminal ang private complainant witness lang gyod; ang tinuod nga nasad-an (offended party) mao ang estado. Mao nang People of the Philippines v. Eduardo _______ ang titulo.

Kabahin sa imong reklamo, kon slight physical injuries o less serious kini, moagi pa kini sa barangay. Kon slight physical injuries lang, paso na tingali kini kon nahitabo ang pagpangulata sa wala pa ang Hulyo 29, 2020.

Hinaot nakatabang kini kanimo.

– Atty. V

**

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.