Brigada Balaod

Sayop ang gidak-on sa yuta

Dear Atty. V,

Nakabasa ko bahin sa nangutana ninyo sa ilang yuta nga paghuman og survey nahibaw-an nga ang silingan diay mi-encroach nila. Kining akong pangutana bahin sa yuta nga gipalit nako sa data-data. Tinuod nga giadto ni namo sa wala pa mi mobayad sa downpayment Attorney, ug ang pag-ingon sa seller sa amo nga 3,000 square meters kuno. Gibaligya niya sa tag PHP 1,500.00 ang square meter. Mi-dowpayment mi og PHP 1,000,000.00 ug ang nahibiling PHP 3,500,000, pagabayran namo sulod sa 36 ka bulan. Sa ato pa dul-an 100k matag bulan. Mahuman na mig bayad karong March 2021 Attorney ug maong amo na unta ipakoral ang yuta. Karon among gipasurvey. It turned out mga 2,300 square meters ra diay, bali nailad mi og mga 700 square meters.

Unsay angay buhaton namo ani? Miingon man ang seller nga kon di namo bayrag tiwaa iya ibaligya sa lain ug tankyuhon ang among kwarta. Daghan kaayong salamat.

****

Dear Texter,

Ang unang pangutana ning maong sitwasyon mao ni: mopalit ba kaha kamo sa maong yuta sa kantidad nga PHP 4.5 M kon nasayod pa kamo nga 2,300 ug dili gyod 3,000 square meters ang area niini? Kon oo ang tubag, maka-rescind (cancel) mo sa kontrata ubos sa Article 1539 sa Civil Code. Kon dili ang tubag, dili mo maka-cancel sa kontrata.

Mahimo usab nga i-exercise ninyo ang inyong right of rescission kon ang inyong kontrata may statement sa gidak-on ug sa presyo matag metro kwadrado, nga maoy nahimong basehan sa kinatibuk-ang presyo.

Sa rescission, may obligasyon ang seller nga iuli ang tanan ninyong nabayad, ug ang damages (pananglitan, legal interest sa nabayad nga kwarta, actual expenses sa survey, etc.). Kon dili nila iuli, o di siya mobayad, kinahanglan ka moadto sa korte aron maprobar ang imong kaso.

Since sale on installment ni, I understand ang inyong papel nga gikuptan Deed of Sale on Installment, dili Absolute Deed of Sale. Kon wala ni ninyo ipa-annotate sa title sa yuta o sa tax declaration kon walay title, buyer in good faith ang baligyaan unya ani sa seller. Sa ato pa ang angay gyod dayon ninyong buhaton mao ang pagpa-annotate sa Deed of Sale on Installment.

On a practical note, since March 2021 mo mahuman unta og bayad sa ato pa naa na mo karon sa ika-30 nga monthly installment. Bali nakabayad na mo og PHP 1,000,000 (downpayment) + (PHP 97,222.22 x 30) o mga PHP 3,916,666.60. Mga tunga na lamang sa milyon ang kuwang aron makompleto ang 4.5 M. Kon akoy naa sa inyong sitwasyon, tiwason ko na lang na og bayad at least magamit na nako sugod Abril 2021 ang 2,300 square meters. Maigo hinuon og tag almost 2k per square meter, pero adto na lang na bawia sa paggamit sa yuta. Kon mokaso ka, dugay pa kaayo mahuman, gasto pa, ug ang best case scenario either ipauli sa imo ang tanan nimong nabayad plus legal interest ug damages, or ipa-reduce ang presyo by PHP 1,050,000 (1,500 × 700). Meanwhile, dili pa nimo magamit ang yuta. Ang mga kaso nga ingon ani mahimong modagan gikan sa tulo ngadto sa unom ka tuig.

Mao ni nganong importante nga moduol og mga propesyonal kon naa tay paliton nga yuta. Duna man tay mga gitawag nga real estate broker. Duna silay training sa pag-estimate sa gidak-on sa yuta aron maka-warning sa buot mopalit nga layo ra giingon sa seller ang area.

Hinaot nakatabang kini kanimo.

– Atty. V

**

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.