Brigada Balaod

Nagduda nga mangingilad ang abogado

Dear Atty. V,

Naaghat ko sa pagpadala niining akong pangutana sa imong kolum kay nahasol na gyod ko aning usa ka abogado nga nakabayad na ko og 50 mil unya magsige lag og unya-unya sa akong kaso. Hangtod nga giadto nako sa giingong opisina niya ug akong nadiskubrehan nga dili diay mag-adtoan sa opisina. Sakto ba god na Attorney? Pwede diay na ang abogado nga dili na mag-adtoan sa opisina? Unsa may angay nakong buhaton? Tinuod kaha ni siya nga abogado? Salamat.

*****

Dear Texter,

May online facility ang Supreme Court pag-verify kon naa na sa lista sa mga abogado ang usa ka ngalan: https://sc.judiciary.gov.ph/lawlist

Mahimo mong ma-check ang ngalan sa maong abogado didto sa maong website.

Hinuon, ang maong lista naglakip gihapon sa mga patay na o na-disbarred o na-suspenso nga abogado.

Ang lain mong paagi sa pag-check mao ang pag-adto sa mga opisina sa Integrated Bar of the Philippines (IBP) Cebu Chapter ug Cebu City Chapter. Pulos kini naa sa IBP Bldg. sa Cebu Provincial Capitol compound. May lista sila sa ilang mga miyembro lakip ang mga address. Apan kay self-reporting kini, may daghang abogado nga dili pa updated ang address. Usahay dili pod sila aware nga patay na o disbarred o suspended ang lawyer. Finally, dili tanang abogado nga nag-practice sa Sugbo miyembro sa IBP Cebu o IBP Cebu City.

Ang labing maayong paagi mao gayod ang pagpili og abogado binase sa feedback sa imong mga kaila nga naka-engage na og abogado. Mao kini usa sa mga hinungdan nga dili kami allowed mag-advertise.

Ubay-ubay kog kaila nga abogado nga nagmintenar lag opisina aron naay kapadalhan sa mga notices. Dili na sila mag-adtoan sa opisina; i-scan na lang og ipadala sa ila sa ilang secretary ang mga nadawat nga papeles. Sa pag-adopt sa Supreme Court sa email service ug filing tungod sa COVID, expected nga mas daghan pang abogado nga mo-adopt ning maong sistema.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.