Brigada Balaod

Mikabat og usa ka tuig usa miangkon

Dear Atty. V,

Pwede ba magpa-advice nga walay bayad? Ingon ani man god Atty. ba. Gikawatan man god mi pag last year, gilungkab ang among balay. Then karon pa miangkon ang isa sa kawatan nga among silingan. Dili diay nako siya pwede ipapreso Atty. nga miangkon na man siya nga isa siya sa nangawat? Tungod kay walay makatestigo nga siya isa sa nangawat maong dili siya pwede makasohan?

Salamat Atty sa time. Naka-record na man didto sa police station kay gidala man mi sa taga-barangay didto sa police station. Mi-confess na siya didto atubangan sa police nga isa siya sa nangawat.

Salamat Atty. Ako diay si Irene.

***

Dear Irene,

Ubos sa atong mga balaod, ang tawo mahimo lamang mapriso sa lima ka sitwasyon: 1) may warrant of arrest batok kaniya; 2) nadakpan siya in flagrante delicto; 3) nadakpan siya pinaagi sa hot pursuit; 4) pugante siya; ug 5) suspetsado siya sa terorismo ubos sa Anti-Terror Act of 2020. Kon wala masulod ning lima, walay legal nga rason nga bilanggoon ang usa ka tawo. Kay wala man ning lima ang inyong sitwasyon, nan dili nimo siya mapa-preso.

Mahimo kang mokiha kaniya, ug kon makakita og probable cause ang piskaliya dalhon nila ang kaso sa husgado. Kon sa tan-aw sa huwes may probable cause para moisyu og warrant of arrest, maisyu kini ug pwede na madakop ang usa ka tawo.

Apan kon ang iya lamang pag-angkon ang imong basehan ug walay laing ebidensya, hayan ultimately ma-dismiss ra ang kaso. Walay problema kon angkonon niya atubangan sa korte ang iyang mga pamahayag kanhi, apan mahimo gayod kaayo siyang mobali. Ang iyang pang-angkon didto atubangan sa pulis kinahanglan nga sinulat, ug dapat giasistihan siya og manlalaban. Dapat usab nga napasabot siya sa manlalaban sa consequences sa iyang pag-angkon. Kon naay bisan usa lang nga wala matuman niini, most likely than not, i-dismiss ang kaso.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.