Brigada Balaod

Gipugos pagpaangkon sa sala

Dear Atty. V,

Ako diay si Greg. Ang akong problema kabahin sa pag-planted sa ako og shabu sa mga pulis sa among lungsod. Kontra man god ni nakong pulisa kay sa una uyab ni sila sa akong manghod unya iya mang gikulata maong ako siya gireklamo didto sa hepe. Naareglo ra nuon mi, gabuwag na lang sila sa akong manghod, apan gidumtan gyod ko niya. Mibahad gyod siya nga iya gyod kong gukoron.

Tuod man, niadtong miaging tuig Atty., gi-ransack mi sa mga pulis sa among lungsod sa _________. Dayon pagpicture-picture didto sa presinto, ila kong giingnan nga nakuhaan kuno ko atong mga pakete sa shabu ug napalitan pa gyod kuno ko. Pero sa pagkatinuod Atty. Vince wala pa gyod ko sukad masukad nakatilaw anang shabu. Gani katong didto sa police station maoy una nakong kakita ana.

Niadtong Marso, sa wala pa mag-lockdown tungod sa COVID, giingnan ko sa PAO nga aminon na lang ang sala aron dili ra ko madugay sa sulod, anyway maka-apply man ko og probation. Mi-attempt ko og explain niya nga di ko moamin kay wa man koy sala apan nasuko man nuon siya. Mao tong miamin na lang ko. Gisentensyahan ko og total nga pagkapriso nga upat ka tuig kapin. Gipapyansa ko sa huwes ug maong diha na ko sa gawas pag-lockdown tungod sa COVID. Apan karon lang bag-o nakadawat ko og order sa korte nga nagkanayon nga pasurenderon ko sulod sa 15 ka adlaw human madawat nako ang order kay denied ang akong application for probation kay naa man koy prior conviction sa slight physical injuries. Papuy-an daw sa ako ang nahibiling mga tuig sa akong sentensya, kuhaon tong didto ko sa sulod.

Ang akong mga pangutana, Attorney, mao kining mosunod. Angay ba kong mosurender? Kon di ko mosurender unsa may mahitabo sa ako? Nganong gipugos man ko pagpaamin sa PAO nga wala man koy sala? Nganong wala man ko pangutan-a sa PAO kon nakombikto na ba ko sa una? Ang iya gipangutana sa ako, nga kon duna ba koy laing kaso. Apan nahuman na man to ang akong kaso sa una so atong pagpangutana niya nako ang kato na lang sa planter sa shabu ang akong kaso. Unsa may mahimo nako niini? Salamat gyod kaayo Atty. Si Greg ni.

*****

Dear Greg,

Gikinahanglan gyod kang mosurender kay may order na man aron mosurender ka. Kon dili ka mosurender isyuhan ka og warrant of arrest sa korte ug ang mga pulis may katungod na sa pagdakop kanimo. Usa pa, dili ka kapangayo og mga relibo gikan sa korte kon wala ka magpailawom sa gahom niini pinaagi sa pagsurender.

Wala koy personal nga kasayoran kon unsa may giestoryahan ninyo sa PAO, pero sa akong nabantayan, mosugyot sila nga mo-avail sa plea bargaining kon bug-at ang ebidensya. Hinumdomi ang pagpamaligya og shabu, bisan kon 0.01 g lang, life imprisonment. Sa possession usab, kon 50g o labaw pa, life imprisonment na. Ikompara kana sa dili molapas nga 6 ka tuig nga priso alang sa duha ubos sa plea bargaining. Apan kon para nimo gipugos gyod ka, imo unta tong gisulti sa huwes. Dili man makabuot sa imong plea ang PAO.

Tingali nagka-misunderstanding mo sa PAO. Alang nako, ang termino nga “may laing kaso” nagpasabot nga kaso nahuman na o wala pa.

In any case, kon dili gyod ka gusto nga puy-an na lang ang imong sentensiya, mahimo kang moduol og pribadong abogado ug sulayan ang korte pagkombinser nga improvident plea of guilt tong imoha. Kon mosugot ang korte, i-invalidate to ang plea nimo og padayonon ang kaso. Apan mabalik lang gihapon ka sa prisohan hangtod tugtan ka sa korte nga makapyansa.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.