Brigada Balaod

Ang nagbaligya dili maoy ginganlan sa titulo

Dear Atty. V,

Tawga lang ko sa ngalang Cleo. Naa unta koy pangutana kabahin sa yuta, Attorney. Naa man goy nauyonan nga yuta, titulado, apan ang nagbaligya dili pa mao ang ginganlan sa titulo. Actually iya ni yuta sa una unya nabaligya niya og laing tawo, unya na-transfer ang titulo. Then nagkalisod sa kwarta ang nagpalit sa yuta, gibaligya og balik sa iyaha. Naa siyay Deed of Sale. Pwede ba ni nako paliton Attorney? Barato ra man god, maigo lag 50 pesos ang per square meter unya mo-execute ra siya og Absolute Deed of Sale bisan og katunga pa sa presyo ang akong nabayran, basta bayran lang siya sa kulang sulod sa duha ka tuig. Daghang salamat.

*****

Dear Cleo,

Kon notaryado ang Deed of Sale nga ang seller ang naa sa certificate of title ug ang nagbaligya sa imo ang buyer, walay legal nga rason nga dili madayon ang transaksyon.

Apan daghan og red flags ning maong transaction. Sa mga transaction sa real estate gikinahanglan ang gitawag nga due diligence, kon tukmang pagtino sa sitwasyon sa yuta. May mga propesyonal nga maduolan nimo niini, sama sa mga real estate brokers. Mahimo usab nga ikaw mismo maoy mo-conduct sa due diligence apan dili gyod kalupigan ang experience sa mga propesyonal nga kini maoy panginabuhi. Pangita og professional nga ang bayad dili magdepende kon dayonon ba nimo og palit o dili ang yuta; kini nagpasabot nga kon mohatag og go-signal ang maong professional gamay kaayo og chance nga masipyat mo.

Una sa tanan, wala nimo hisgoti kon notarized ba o dili ang Deed of Sale. Kon dili kini notarized, dili mo makapadayon sa transaction. Kon notarized kini, kinahanglang mahatagan kag saktong rason sa seller nganong wala niya mapabalhin sa iyang ngalan og balik ang titulo.

Ikaduha, although posible gyod, panagsa ra kaayo nga ang former owner mopalit og balik sa iyang yuta. Gani magbaligya kita og yuta aron makakwarta.

Ikatulo, barato ra kaayo kanang PHP 50.00 ang metro kwadrado.

Ikaupat, nganong mo-execute siya og Absolute Deed of Sale nga wala pa mabayri sa tibuok kantidad? Kon duna nay Absolute Deed of Sale mahimo na ninyong ibalhin ang titulo sa inyong ngalan.

Ang akong isugyot kanimo, pangitaa ang tawo nga ginganlan sa titulo og pihoa nga iya gayong gibaligya ang yuta.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.