Brigada Balaod

Papahawaon sa giabangan

Dear Atty. V,

Mangutana lang ko kon makapapahawa ba ang tag-iya namo sa among giabangan nga balay sa panahon karon nga pandemic nga lisod kaayo ang mangita og abang. Kay kani god amo lugar gibaligya sa tag-iya unya ingon sa tag-iya nga September ra kuno mi kutob kay gub-on na daw ni sa nakapalit himoon og garage sa iyang mga sakyanan unya mihangyo mi nga ma-extend unya miingon daw ang nakapalit nga October na lang daw kutob. Dili ba diay mi tagaan og allowance nga lisod kaayo ang mangita og abangan kay COVID baya ron pwede diay mi mapapahawa og dayon sa panahon karon? Salamat Attorney. Hinaot mahatagan mi og katin-awan.

*****

Dear Texter,

Wala ka makahisgot nga naa moy kasulatan so ako i-presume nga wala. Kon duna moy kasulatan kon unsay naa didto maoy tumanonon.

Kay wala man moy kasulatan, kon unsa ang inyong binayran (binulan) maoy basehan sa inyong kontrata. Wala moy katungod nga molapas sa pagpuyo sa bulan nga inyo nang nabayran. Isip tag-iya sa yuta, iyang katungod ang unsa mang himoon sa yuta ug sa unsa may naa sa maong yuta. Kay iya man kining gibaligya, nan ang bag-ong tag-iya na ang magbuot.

Nahisubay sa balaod nga giingnan kamo nga September na lang taman, kay Agosto pa man karon.

Unfortunately walay gihimo nga balaod kalabot niini ang atong kagamhanan. Mas importante pa man god nila ang barrier sa motorsiklo. Naa tuoy Department of Trade and Industry (DTI) Memorandum Circular No. 20-29 nga nag-ingon nga walay eviction tungod kay wala makabayad sa renta apan walay giapil kadtong i-evict kay ibaligya na ang yuta. Usa pa, ang maong MC giisyu pinasubay sa Republic Act No. 11469, nga mi-expire na ang epekto niadtong Hunyo 25.

Hinaot nakatabang kini kanimo. Unfortunately mao kini ang balaod.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.