Brigada Balaod

Prescription sa Slight Physical Injuries

Dear Atty. V,

Tawga lang ko sa ngalang Marie. Niadtong Marso 1, 2019, gikulata ko sa silingan namo nga nanguyab nako. Pagka Marso 31, 2019, mikiha ko niya sa barangay ug naisyuhan ko og Certificate to File Action (CFA) Hunyo 14, 2019. Pagka Hunyo 17, 2019 miduol ko og usa ka abogado. Naka-file mi og kaso sa piskaliya Hulyo 1, 2019.

Apan ang piskal wala motuo nga nanguyab ang amo silingan nako ug slight physical injuries ra ang findings. Unya kay Hulyo 1, 2019 na man namo na-file, prescribed na kuno. Nganong ingon ani man ni Attorney? Dili diay ang unsay among reklamo maoy basehan?

Mi-file ang akong abogado og motion for reconsideration apan denied. Unfortunately namatay ang akong abogado kay nagka-COVID. Wala pa daw nila madawat ang resolution sa MR pero naabot sa amoa niadtong Lunes. Unsa may mahimo nako ani Attorney?

– Margie

*****

Dear Margie,

Maayo nga naghikutar gyod ka ani bisan kon namatay na ang abogado.

Kon buot mong questionon ang resolusyon, mahimo kang mopasaka og petition for review sa Office of the Secretary. Kinahanglan ma-file ni sa wala pay 15 ka adlaw gikan sa pagkadawat nimo sa resolusyon.

Kon wala makita sa piskal nga duna gyod moy relasyon sa imong silingan nga masulod sa R.A. No. 9262, slight physical injuries ra gyo ang kaso. Ang maong kaso mo-prescribe kun mopaso sulod sa duha ka bulan. Niadtong panahon nga didto kini sa barangay, dili modagan ang prescription sulod sa duha ka bulan. Kon molapas sa duha ka bulan modagan na pod. Sa ato pa, kon wala pa maabot sa piskaliya ang sumbong sulod sa 4 ka bulan o 120 ka adlaw human sa pagkahitabo, paso na kini.

Marso 1, 2019 nahitabo ang pagpangulata. 120 ka adlaw gikan Marso 1, 2019 ang Hunyo 29, 2019. Apan kay Sabado man kini, kinahanglang i-file sa Hunyo 28, 2019, Biyernes.

Inyo gi-file Hulyo 1, 2019 na, busa paso na ang kaso.

Dili ang unsay inyo deskripsyon sa kaso kon dili unsa gyoy nahitabo ang sundon, otherwise makabuot-buot lang ta kanus-a mo-prescribe ang krimen.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.