Brigada Balaod

May kapuyo abroad

Dear Atty. V,

Tawga lang ko sa ngalang Arlene. Usa ko ka-OFW pero currently na-stranded sa Pilipinas tungod sa COVID.

Ang akong problema kabahin aning ako nakaila didto sa gawas nga ginganlang Carlo. A few years ago Attorney, nagkauyab mi. Naa na koy anak atong panahona, mag-upat na ka tuig, si Keisha. Miingon si Carlo nga tungod kay nahigugma gyod siya nako, iyang ilhon si Keisha nga iyang anak. Mao tong iya tawag-tawagan sa Pilipinas ang bata ug nagpaila siyang maoy amahan. Kay managlahi man mig kontrata, una siyang nauli sa Pilipinas ug nakigkita pa sa akong anak ug pamilya.

Nagsige gyod ang among relasyon hangtod nga nahabilin siya didto sa gawas pagsugod sa COVID niadtong Marso. Diha na nagsugod ang problema Attorney kay it turned out minyo diay siya. Na-trace ko sa Facebook sa iyang asawa ug giingnan ko nga ikiha gyod ko niya kay kabit kuno ko. Iya pa kong giingnan nga gi-blackmail ra kuno nako ang iyang bana maong giila ang akong anak. Ug nangolekta pod siya sa nahatag sa iyang bana. Ang akong mga panguta Attorney mao ni:

1. May makiha ba sa akoa ang asawa ni Carlo?
2. May makiha ba ko sa asawa ni Carlo?
3. Pwede ba nakong ikiha si Carlo kay nagpaila siya nga amahan ni Keisha?
4. Makabayad ba ko sa mga napadala ni Carlo ngadto kang Keisha?

Salamat gyod kaayo Attorney nga naa mo nga andam mohatag og tabang namong mga kabos nga dili maka-afford og abogado. Padayon gyod kong maminaw sa Brigada News FM labi na gyod sa oras ni DJ Rhandi.

– Arlene

***

Dear Arlene,

Sa akong nasabtan sa estorya nimo, didto ra gyod mo sa gawas nagpuyo isip managtiayon ni Carlo, wala diri sa Pilipinas. Busa, sa una mong pangutana, dili ka makiha og concubinage sa asawa ni Carlo, kay ang atong Revised Penal Code generally sa sulod ra man sa Pilipinas moepekto.

Sa akong tan-aw dili pod ka makiha og violation sa Republic Act No. 9262 (Anti-Violence against Women and their Children kun anti-VAWC) kay miurong na man ka og communicate ni Carlo human ka nasayod nga minyo diay siya.

Sa ato pa, walay makiha ang asawa ni Carlo batok kanimo.

Sa imong panguta kon may makiha ka ba sa asawa ni Carlo, kon magsige pa siyag sinamok, at least unjust vexation na. Kon duna pod siyay third person nga hisgotan nga nang-blackmail ka o kabit ka, makakiha ka og libel o di ba kaha slander.

Sa akong tan-aw, walay legal nga basehan nga ikiha ni Keisha o nimo si Carlo tungod kay nagpaila siyang amahan ni Keisha.

Finally, sa akong opinyon, mahimong mapa-invalidate sa asawa ni Carlo ang unsa mang gihatag sa imoha (apan dili sa kang Keisha) tungod kay sa atong balaod gidili nga modonar ngadto sa iyang kabit ang usa ka tawo. Apan kini nag-pressuppose nga maprobar sa asawa niya nga may donation gayod gikan sa kang Carlo nganha kanimo.

Hinaot nakatabang kini kanimo.

– Atty. Vince

**

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.