Brigada Balaod

Buot ikiha ang bana

Dear Atty. V,

Naa lang unta ko pa-advice nimo. Usa ko ka kasado sa ako bana. Naa mi anak duha sa ako bana. Unya naa pod ko anak usa sa ako katipon. Unya ang ako bana Atty. naa pod kaipon karon naa sad sila anak duha sa ako bana. Pwede ba nako sila magukod Atty. karon nga namatay man akoa kaipon. Salamat ug maayong adlaw kanimo Atty.

*****

Dear Texter,

Mahimo nimo silang makiha sa kasong concubinage. Kon mapamatud-an may sala, ang imong bana masilotan og prision correccional minimum ug medium, kun 6 ka bulan 1 ka adlaw ngadto sa 4 ka tuig 2 ka bulan nga pagkabilanggo. Apan ang kabit destierro o pagpalayas lang ang silot.

Apan sa dili mo pa kana buhaton, timan-i nga pwede pod ka ikiha niya og adultery. Ang lig-ong ebidensiya niini mao ang Certificate of Live Birth sa anak ninyo sa kanhi mo kabit, kon dili ang imong bana ang gibutang didto isip amahan. Mahimo usab nga ang testigo katong nakakit-a ninyo sa imong kanhi kapuyo nga nagpuyo. Ang lisod sa imong sitwasyon, wala na ang imong kapuyo aron unta ipanghimakak nga nagpuyo mo.

Usab, ang adultery mas taas og pagkabilanggo, prision correccional medium ug maximum o 2 ka tuig 4 ka bulan 1 ka adlaw ngadto sa 6 ka tuig.

Intonses, pwede ra gyod ka mokiha. Apan hunahunaa pod nga naay ikabalos sa imo, ug mas sayon pagprobar ang adultery kay sa concubinage kay may anak man mo sa imo kanhi kabit. Kani nagpakita sa prinsipyo nga kon mangiha ka, seguroha nga limpyo pod ang imong kaugalingon.

Hinaot nakatabang kini kanimo.

– Atty. V

**

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.