Brigada Balaod

Silot sa disgrasya sa bangga

Dear Atty. V,

Tawga lang ko nga Jerome. Buot lang unta ko makahibawo og unsa diay tukma nga silot nianang makabangga ginamit ang sakyanan? Gipasinganlan man god ang akong manghod nga maoy nakaligis sa nagbisikleta didto sa laing barangay, ug karon pabayron mig usa ka milyon sa tagtungod sa biktima otherwise matanggong gyod kuno sa bilanggoan ang akong manghod. Daghan kaayong salamat.

*****

Dear Jerome,

Ang kamatayon, o physical injuries, o damage to property tungod sa pagkabangga sa sakyanan gi-criminalize isip criminal negligence ubos sa Art. 365 sa Revised Penal Code (RPC). Ang silot gibase sa silot kon willful (dolo) ug dili pa negligence o imprudence ang hinungdan sa kamatayon, physical injuries, o damage to property.

Kon may namatay ug dunay violation sa Automobile Law (karon Republic Act No. 4136 kun Land Transportation Code na), ang silot prision correccional medium and maximum (2 ka tuig, 4 ka bulan, 1 ka adlaw ngadto sa 6 ka tuig nga pagkabilanggo).

Kon may namatay apan walay violation sa Automobile Law, ang silot arresto mayor maximum ngadto sa prision correccional medium (4 ka bulan, 1 ka adlaw ngadto sa 4 ka tuig, 2 ka bulan).

Kining dunay namatay mao ni gitawag nga reckless imprudence resulting in homicide.

Sa pagdeterminar sa silot kon wala mamatay ang biktima, tan-awa ang Art. 262 ug 263 sa RPC.

Kon naputol ang kinatawo (mutilation, Art. 262) o nabuang, nabaog, o nabuta ang biktima (par. 1, Art. 263), ang silot arresto mayor maximum ngadto sa prision correccional medium.

Kon ang nasinati sa biktima mao ang uban pang serious physical injuries (dili na makasulti, nabulhog, naputlan og kamot o tiil, ubp.), ang silot arresto mayor minimum ug medium (1 bulan, 1 ka adlaw ngadto sa 4 ka bulan).

Kon ang nasinati sa biktima mao ang less serious ug slight physical injuries lang, ang silot arresto menor maximum (21 ngadto sa 30 ka adlaw).

Kon damage to property ang nahitabo, ang silot multa nga sama sa bili sa mga butang nga naguba ngadto sa katuloon ang bili, apan dili gyod mokubos sa P5,000.00.

Kon sagol dunay namatay, na-physical injuries, ug na-damage to property, base sa desisyon sa Korte Suprema sa Ivler v. Modesto-San Pedro, G.R. No. 172716, November 17, 2010, ikuyog ra sa usa ka kaso (dili bulagon). Ang silot base sa gitala sa taas. Pananglitan, kon magtiayon ang sakay sa kotse nga gibanggaan sa nag-counterflow, namatay ang bana apan slight physical injuries lang sa asawa, ug total wreckage ang sakyanan nga tag 1 ka milyon, ang silot arresto mayor maximum ngadto sa prision correccional medium alang sa kamatayon sa bana, arresto menor maximum alang sa physical injuries sa asawa, ug multa nga gikan sa 1 ngadto sa 3 ka milyon.

Kabahin sa imong manghod, walay kamatuoran nga matanggong sa bilanggoan sa dugay nga panahon ang imong igsoon. Ang labing dakong mapahamtang sa iyaha, 4 ka tuig ug 2 ka bulan nga pagkabilanggo, nga mahimong serbisyohan pinaagi sa probation.

Hinuon wala ni magpasabot nga wala na moy bayranan sa biktima. Obligado kamo mobayad sa gasto sa pagpaospital, ingon man ang loss of income niya kay naospital siya.

Hinaot nakatabang kini kaninyo.

– Atty. V

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.