Brigada Balaod

Gi-dismiss ang kaso; counter-charge nagpadayon

Dear Atty. V,

Usa ko ka yanong mag-uuma sa usa sa mga bukirang barangay sa Sugbo. Naikag ko nga mopadangat niining akong suliran kay nahasol gyod ko niini.

Ingon ani man god Attorney. Duna mi yuta nga gitikad sa ako pang mga apohan. Unya niadtong 2016 dunay miadto nga nailhang drug lord sa among lungsod ug iya kunong napalit ang yuta ug iya ming papahawaon. Pero wala siyay papeles nga ikapakita.

Mikiha siya namo og ejectment ug maayo na lang gali gitabangan mi og abogado pro bono ato mao nga gi-dismiss sa korte. Sa wala pa ma-appoint pagkapiskal ang maong abogado, iyang giuli sa amo ang mga papeles ug giingnan mi nga nahuman na to ang kaso apan kon magsinamok og balik kinahanglan na mi mokuha og laing abogado kay di na siya kalaban namo.

Niadtong wala pay COVID, misulong ang among kontra didto sa uma ug gitigbas ang PVC sa amo patubig. Sa akong kasuko ako siya naingnan nga kon napalit man niya ang yuta gikan sa druga ang iyang gipalit niini. Mao tong nagbawsanay mi og kiha sa barangay ug giusa ra og husay ang mga sumbong. Dungan pod ming naisyuhan og Certificate to File Action.

Meanwhile, ang katong huwes nga nag-dismiss sa ejectment case na-promote sa Regional Trial Court. May bag-o nang huwes sa municipal court. Giingong suod kaayo kini nga huwes sa igsoon sa among kontra. Ang akong gikahibudngan, Attorney, kay gi-dismiss ang among sumbong nga malicious mischief nga prescribed na kuno, apan mipadayon lagi ang slander batok sa akoa?

Unta matabangan ko nimo.

– Adrian

*****

Dear Adrian,

Ang malicious mischief may silot nga arresto menor (1 ngadto 30 ka adlaw nga pagkabilanggo) kon wala moanot sa PHP 40,000.00 ang bili sa butang nga giguba. Nasulod sad tingali niini ang bili sa inyong PVC.

Ang slander o oral defamation may silot nga arresto mayor maximum ngadto sa prision correccional minimum (2 ka bulan ug 1 ka adlaw ngadto sa 2 ka tuig ug 4 ka bulan nga pagkabilanggo) kon serious and insulting; arresto menor ug PHP 40,000.00 nga multa kon dili. Sa akong tan-aw, serious and insulting nga imo siya giingnan nga ang kwarta nga gipalit sa yuta gikan sa pagbaligya og illegal nga drugas.

Ubos sa Art. 9 sa Revised Penal Code, ang may silot nga arresto menor, light felony lang. Ang light felony mo-prescribe in two months.

Ubos sa Art. 90 sa RPC, ang slander o oral defamation mo-prescribe in two months.

Ang pag-ihap sa prescription mao kini: magsugod og ihap pagkahitabo gyod dayon hangtod dalhon sa barangay ang kaso, apan kon molapas sa duha ka bulan sa barangay, mopadayon na pod og ihap.

Sa ato pa, gikan sa pagkahitabo hangtod sa pag-file sa korte, kuhaan sa gidugayon nga didto sa barangay apan maximum sa 2 months, kon molapas og 2 months, prescribed na. Alang sa oral defamation six months pa.

Ang akong isugyot, ipa-review sa Public Attorney sa inyo korte ang inyong sitwasyon aron matino gayod kon nasunod ba ang balaod.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.