Brigada Balaod

Sigehog sungog nga tulion

Dear Atty. V,

Maayong adlaw kaninyo. Kanunay gyod kong maminaw sa Brigada News FM ug usahay kon naa koy maabtang kopya sa among silingan makapalit pod ko og Brigada Newspaper.

Ang akong pangutana kaninyo kabahin ning among silingan. Katalingngan ni siya sa akong bana ug matod pa, dihang naglinya na unta kuno sila sa una aron magpatuli, mikaratil ni og dagan ang akong bana maong nagpabilin siyang pisot. Dili ra pod isyu sa akoa kay in fact mas ganahan ko sa iyaha kay sa previous nako nga uyab nga tinuli. Mora man god og may extra nga palami ang iyaha. Apan kining among silingan hangtod karon magsige og panulog sa akong bana. Pirme niyang bugalbugalan ang akong kapikas kon maagi sa ila nga nag-inom, iyang tawgong pisot. Dili lang pod tawon mokihol ang akong bana kay tinuod man.

Ang lain nakong problema mao nga karon mag-4 anyos na ang among anak nga lalaki. Sa una kada kakita niining among silingan sa akong anak, iya gyong timangan nga anak kuno sa pisot nga kinatawo. Karon kay iya na gyod hadlokon nga tulion, iya pa gyod gukoron padulong sa balay. Ang bata intawon inigkakita niya mangluspad og dinagan.

Unsa may angay nakong buhaton niini? Daghan kaayong salamat Brigada Balaod.

– Ezra

*****

Dear Ezra,

Sa atong kultura, sayop man o dili, giila nga kinahanglan matuli ang usa ka lalaki sa bata pa. Gali, bisan niadtong may usa ka Speaker sa Kongreso nga giingong pisot kuno, naapil sa nasodnong diskurso ang kabahin niini.

Sa sitwasyon sa imong bana, at least Unjust Vexation ang gihimo sa inyong silingan. Depende sa pagka-appreciate sa fiscal, pero basig Slander o Oral Defamation usab ang iyang nahimo. Apan isip usa ka defense counsel mas makita nako ang posibilidad nga dili defamatory nga tawgong “pisot” kay pwede man i-argue nga dili ni defect in character or something nga angay ikauwaw (sama sa pagkabayot). Either way, idangop na sa barangay (kon gusto sa imo bana) ug kon makapangayo na kamo og certificate to file action, adto kamo sa pulis pagpatabang og dukdok sa complaint-affidavit.

Apan kanang bahin sa imong anak lahi na nga estorya. Tataw nga child abuse ang gibuhat sa inyong silingan. Laliman ka nga mangluspad ang imong anak sa kahadlok. Idangop kini sa Municipal o City Social Welfare Development Office sa inyong dapit o sa Women and Children Protection Desk sa inyong estasyon sa pulis aron matabangan mo.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.