Brigada Balaod

Naa nay kaipon ang inahan

Dear Atty. V,

Magpatambag unta ko. Ang among inahan ba, naa sa lain lalaki. Angay pa ba siya modawat sa pension sa amo amahan, nga wala na man siya mopuyo kuyog namo nga ilang mga anak? Paabot ko sa imong reply Atty. Salamat. Solid Brigada listener ni.

*****

Dear Solid Brigada Listener,

Matod pa sa Sec. 13 sa Republic Act No. 11119, ang atong Social Security Law of 2018, kon mamatay ang usa ka miyembro sa Social Security System (SSS) nga nakabayad na og at least 36 ka binulan nga kontribusyon, ang iyang primary beneficiaries entitled sa monthly pension.

Ang primary beneficiaries mao ang dependent spouse ug ang dependent children below 21 years old.

Sa litaniya sa mga kaso sa Supreme Court, giklaro sa labawng hukmanan nga aron mahimong qualified sa pension sa namatay nga kapikas sa kinabuhi, gikinahanglan iprobar sa surviving spouse ang duha ka butang: (1) nga siya ang legal spouse (pinaagi sa Certificate of Marriage); ug (2) nga dependent siya sa namatay (pinaagi sa Joint Affidavit of Two Disinterested Persons nga mobarog nga sa dihang namatay ang kapikas, ang surviving spouse walay trabaho o kita o negosyo).

Wala pa kitay nahibaw-an nga desisyon sa Korte Suprema nga diretso mi-address sa isyu kon mawagtangan ba sa pension kon dunay kapuyo ang surviving spouse. Apan sa sitwasyon diin ang kapikas (usually asawa) dunay kapuyo sa wala pa mamatay ang SSS member, ang tendency mao nga dili mahatagan og pension ang surviving spouse. Ang interpretasyon usab sa Social Security Commission mao nga dunay kapuyo, dili mahatagan sa pension.

Ang angay nimong buhaton mao ang pagpahibalo sa SSS bahin sa inyong sitwasyon. Kon sa ilang pag-imbestigar ilang masuta nga duna gyoy kapuyo ang inyong inahan, most likely ila na putlon ang pension. Ang inyo nang inahan ang mo-probar didto sa SSC ug ultimately sa SC nga angayan siyang mahatagan sa pension.

Hinaot nakatabang kini kanimo.

– Atty. V

*****

I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.