Brigada Balaod

Sustento gikan sa namatay

Dear Atty. V,

Magpa-advice unta ko nimo about sa ako anak nga 10 yrs. old nga bag-o lang namatay ang amahan sa heart attack pagka middle of June pero dli ko niya asawa. Kana iyang kaipon gibiyaan dili pod niya pinakaslan pero naa sila mga anak 2 puros na mga minyo.

Naghatag man siya sustento sa bata Atty. kay nagkaatubang man mi niya sa barangay. Naa siya gipirmahan. Karon pagkamatay wala man gyod gibilin. Unsay akong buhaton Atty.? Pwede pa mi makapangayo sa sustento sa ako 10 yrs. old nga anak? Naa man siya property gipangbilin.

*****

Dear Texter,

Ang paghatag og sustento usa sa mga obligasyon nga mawala human sa kamatayon sa usa ka tawo. Gani, sa usa ka petition for support, usa sa mga rason alang sa pag-dismiss sa kaso mao nga namatay ang defendant. Bisan dili nato palawman ang legal basis niini, apan sa komon nga pangrason lang, pwede natong ipangutana nganong papanubagon man ang mga eredero sa gipangayoan og sustento sa sustento nga iyang obligasyon.

Sa ato pa, dili ka na gayod makapangayo og sustento alang sa imong anak.

Apan imo usab nga timan-an nga eredero ang imong anak sa namatay. Matod usab sa atong balaod, ang kabtangan sa usa ka tawo nga namatay, pagabahinon sa iyang mga manununod. Bisan kon illegitimate child ra siya, ug entitled lang sa 1/2 sa madawat sa usa ka legitimate child, may bili usab ang kabtangan nga iyang bahin.

Ang angay mong buhaton, moduol kag manlalaban aron magiyahan mo unsay sunod buhaton. Sagad niini magpadala og demand letter aron bahinon ang kabtangan. Dayon modangop sa korte kon dili mo magkasabot amicably.

Hinaot nakatabang kini kanimo.

– Atty. V

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.