Brigada Balaod

Nalumos sa utang

Dear Atty. V,

Tawga lang ko sa ngalang Jerome. Nagkaproblema gyod mi sa akong asawa ning nagtubo nga utang. Nagsugod man god ni dihang nadisgrasya ko sa motor og nakautang mi og para opera. Wala ra man ta to moabot og syen mil, apan human sa upat ka tuig kapin namog bayad, dul-an tunga sa milyon na man ang among nabayad og wala pa man gyod mi mahumag bayad. Ako gipangayoag subay ang nagpautang wala man pod siyay mahatag nga subay. Dihang gipatawag mi niya sa barangay, kay di man ko buot makaabsent sa trabaho, ang ako lang asawa ang miadto. Mipirma siya nga atong petsaha naa miy utang nga P150,000.00. Gihinayhinayan namog bayad apan nagkalisod gyod mi kay nagkasakit pod ang among kamanghoran mao tong gikiha na gyod mi sa korte. Karon miingon ang huwes nga kato na lang P150,000 ang bayaran. Unya miingon ang nagpautang namo nga mangayo lang siyag 15 ka post-dated checks nga tag P10,000. Ang akong mga pangutana Atty., mao ni: 1. Balido ba to ang gipirmahan sa akong asawa ug wala bay paagi nga kwestyonon to namo? 2. Maayo kaha nga moisyu na lang mi og tseke? Please tambagi ug tabangi ko.

****

Dear Jerome,

Sa di pa nako tubagon ang imong mga pangutana, tugoti nga mohatag kog opinyon ning klaseha sa nagpautang sa inyo. Matod mo, wala makaabot og P100,000 ang inyong nautang, apan human sa lima ka tuig nga binayranay nga dul-an nas tunga sa milyon ang inyong nabayad, may utang pa gihapon mong P150,000. Sa ato pa, ang P100,000 mitubo og P550,000 sulod sa lima ka tuig, o P110,000 matag tuig. Labaw pas gidoble ang ang gipautang nga kwarta MATAG TUIG. Bisan tinuod wala kitay balaod nga nagdili sa sobrang patubo, apan kaning gihimo sa inyo tataw nga pagpanglupig ug pagpanikas. Wa uroy gabii nang nagpautang sa inyo.

Karon sa imong mga pangutana. Generally, bound kita sa atong gipangpirmahan, ug ang bana bound sa gipirmahan sa iyang asawa and vice-versa. Sa inyong sitwasyon, para nako pwede ninyong gidangop ngadto sa korte ang kamatuoran nga labihan na ninyo kadako og nabayad. Siyaro na man sad og dili moingon ang korte nga sakto na tong nabayad ninyo.

Ang inyong mabuhat karon mao ang pagduol og abogado aron maka-file ka mo og petition for certiorari batok sa order sa korte nga kato na lang P150,000 ang inyong bayaran. Hinuon pod, kon wala gyod moy kabtangan (pananglitan deposito sa bangko, sakyanan, yuta, balay) dili man gyapon ma-execute ang award nga P150,000.

Sa ikaduha nimong pangutana, ayaw gyod kamo pag-isyu og tseke gawas na lang kon segurado mong makabayad. Kay kon di mo makabayad, mapagawsan gyod mo og kaso sa pag-violate sa B.P. 22 kon bouncing check law. Criminal case kini.

Hinaot nakatabang kini kaninyo, ug hinaot matarong na ang inyong financial condition.

– Atty. V

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.