Brigada Balaod

Nakabayad sa online investment

Dear Brigada Balaod,

Usa ko sa inyong bumabasa. Naaghat ko pagpangutana niining akong suliran kay nakapagawas kog dul-an sa P30,000.00. Ani man god, Attorney, dunay investment opportunity nga gi-share sa ako ang ako higala. Gipa-download ko og app sa Android Playstore ug aron maka-create ko og account, kinahanglan ko mag-money transfer. Gamay ra nuon ang initial investment apan kay nakita man nako sa ako dashboard nga mikita ko og dagko pod, mi-investment pa gyod ko. Mao tong naabot gyod og dul-an traynta mil ang ako napasulod. Karon kay mikalit man silag kawala. Dili na mo-connect ang ila app. Offline na pod ang ila website. Ang ako pangutana Attorney, pwede ba ko makakiha sa ako higala nga nag-introduce niini sa akoa? Ug duna pa bay tsansa nga ma-recover ko tong ako traynta mil? Salamat.

***

Dear Texter,

Morag nabiktima ka sa usa ka online scam. Daghan kaayo kini sila karon ug mao ra gyapon na ang ilang modus operandi. Pahatagon kag investment, duna kay dashboard diin nimo makita ang imohang investment, unya ig-abot sa panahon mawala ra sila og kalit.

Ang akong sugyot nimo ug sa uban natong tigbasahan, sa dili pa mo-invest niining maong mga negosyo, labi na nga online, paghimo usa og research kon dili ba sila scam. Bisitaha ang website sa Securities and Exchange Commission (SEC) sec.gov.ph kay naa na silay mga advisory sa mga nasakpan na nga scam nga negosyo. Pangayoi og kopya sa ilang secondary license gikan sa SEC ang negosyo. Dili ni ang Certificate of Incorporation lahi gyod ni nga dokumento. Unya i-check sa SEC kon balido pa ba ang maong secondary license.

Ayaw saligi ang mga testimonial sa mga nag-una nimo kay siyempre gusto ra na sila nga makabawi pod sa ilang investment. Labi nang ayaw og salig unsay makita nimo sa dashboard kay obviously pwede ra himo-himoon sa nagpadagan sa negosyo ang maong figures.

Sa akong tan-aw, dili ka kakiha sa nag-agni nimo. Wala mo man gali hisgoti nga may kwarta nga miagi sa iyang mga kamot. Sama kanimo, probably nailad ra pod siya.

Sa ako lang opinyon, gamay ra kaayo og tsansa nga ma-recover nimo ang imong na-“invest”. Hinaot magmabinantayon ka na sa sunod.

Hinaot nakatabang kini kanimo.

– Atty. Vince

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.