Brigada Balaod

Gireklamo sa silingan

Dear Brigada Balaod,

Ako si Sr. Susan. Mangutana unta ko. Naa ba tay anti-noise law? Naa man god mi silingan bag-o nakapalit og baffles nga pang-disco ba. Unya nagsunod gyod tong mga adlaw nga gipakusgan niyag maayo nga mo-vibrate na gyod ang bungbong sa among kombento. Mao miduol mi niya pagka-Dominggo nga pahinayan lang untag gamay, unya karon ra mi nakahibawo nga gikalain niya kay misumbong siya sa baranggay. Unya gibali mig reklamo nga nadisturbo sad kuno sila sa among prayers unya wala ra gani sila mireklamo, despite the fact nga dili dikit ilang balay sa among prayer room. Mga 30 feet away pa ang ila. Ngano kuno nanghilabot mi sa ilang privacy nga private property man unta ning ilaha. Daghang salamat sa imong tambag Atty.

*****

Dear Sr. Susan,

Wala kitay anti-noise law, apan duna kitay balaod nga mahimong mo-apply sa imong sitwasyon. Kining sobra nga kakusog sa sound system sa silingan, labi na karon sa panahon sa quarantine nga pugos kitang naa sa sulod sa balay, makasamok kaayo. Usa kini ka nuisance, kay matod pa sa Article 694 sa atong Civil Code, katong mo-injure o endanger sa health ug safety sa uban, o annoying ug offensive sa sentido (senses), o shocking or disregarding decency and morality, mga nuisance. Kanang langas kaayo nga tulunggon sa silingan annoying ug offensive na (labi na gayod og karaoke unya sintonado ang nagkanta).

Sakto ra man ta to ang inyong gibuhat nga inyo siya giduol aron hangyoon nga pahinayan ang iyang sounds. Sinilingan ra god.

Imposible pod ning iyang alegasyon nga inyong prayers nakasamok nila, gawas na lamang tingali og nagsyagit-syagit na mo. Apan bisan unsaon natog paminsar, mas makasamok tingali ang sound system nga gipatokar nga mo-vibrate na god ang bungbong, kay sa prayers, bisag nagsyagit-syagit pa. Kon mopugos siya ana nga pangatarongan, mas alkanse siya, kay kon nasamok sila sa inyong prayers, dan mas klaro nga nasamok mos iyang sound system.

Wala may question nga private property na nila. Apan wala man mag-ingon ang balaod nga abi kay imo private property mahimo na nimong buhaton ang bisan unsa diha. Duna gihapon kay mga obligasyon sa imong silingan, lakip na niini nga dili nimo sila samokon, labi na kon kombento sila nga ang kahilom balaanon.

Atubanga lang ni sa barangay ug pasabta ang barangay sa inyong side. Hinaot magkasabot mo niini. Iampo na lang na ang inyong silingan aron malamdagan na.

– Atty. Vince

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.