Brigada Balaod

Gibulagan sa kapuyo

Dear Brigada Balaod,

Magpatambag ko nimo bahin sa ako ka-live in. 15 years nami. May upat ka anak pulos babaye. Nagkabulag mi sa ako ka-live in kay may lain siya nga karelasyon. Nag-ipon na sila. Makagukod ba ko niya nga dili man mi kasado. Unya, Atty., ang mga anak nako dili man niya gusto nga makaestorya nako ang mga bata. Makuha ba nako ang ako mga anak gikan niya kay naa na man siyay lain ka-live in? Tambagi ko Atty. Vince. Tawga lang ko sa ngalang Danny. Manghinaot ko nga matambagan ko sa ako problema. Daghan salamat.

***

Dear Danny,

Tungod kay dili man mo kasado sa imong ex partner, wala gyod kay katungod nga mogukod kaniya. Kini bisan pa kon 15 ka tuig mo nagpuyo. Ang ato man gong mga balaod wala mag-ila sa gitawag nga common law relationship. Maayo unta kadto kon imo pa siyang napakaslan.

Hinuon dili siya makapugong nga makaestorya nimo ang inyong mga anak. Imo kini katungod isip amahan. Ang visitation right, nga mao ang right of access sa mga bata sa non-custodial parent, dili mahikaw kanimo gawas na lamang kon dunay mando gikan sa korte sa paghikaw niini. Dili usab kini dali-daling tangtangon sa korte. Gali dili enough nga basehan sa pagtangtang niini nga wala mosustento ang non-custodial parent.

Tungod kay dili man mo kasado, ang inyong mga anak illegitimate. Ubos sa Article 176 sa atong Family Code, ang illegitimate children adto sa poder sa inahan, gawas na lamang kon ang korte makakitag og compelling reason nga ang mga bata adto ikustodiya sa amahan o sa laing tawo. Nga ang imong ex partner nagluib kanimo dili compelling reason; dili gani compelling reason bisan pa kon kasado kamo. Sa ato pa, magpabilin gayod ang imong mga anak sa imong ex partner. Apan sa nahisgotan na sa unahan, dili niya mapugngan nga makig-estorya o makigkita ka sa mga bata.

Hinaot nakatabang kini kanimo.

– Atty. Vince

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.