Brigada Balaod

Gusto ipa-DNA test ang bata

Dear Brigada Balaod,

Ako diay si Mitch, 19 anyos, ug nagtrabaho sa usa ka fast food chain dinhi sa Sugbo apan originally taga Mindanao gyod ko. Ang ako problema Sir kay napamabdosan ko sa among silingan sa boarding house. Maayo man god kaayo mobulatik ang amaw nadala gyod kos tentasyon. Karon dihang mi-positive ko sa pregnancy test di na moangkon nga iya ang bata. Ang ako lang unta nga ilhon ni niyang bataa aron may obligasyon siyang mosustento kay pila ra man intawoy kita nako isip crew sa fast food chain. Mapugos ba nako siya nga magpa-DNA test aron maprobar nako nga iya gyod ning anak? Salamat. Ayaw lang i-print ang ako number please.

***

Dear Mitch,

Kon ikaw lang, dili mo mapugos ang imong silingan pag-undergo og DNA test. Kini tungod kay ang maong procedure violation sa iyang right to privacy. Sa ato pa, gawas kon mosugot siya o gi-orderan siya sa korte, may katungod siya nga magdumili.

Pwede ka makadangop sa korte aron makapangayo og kamandoan nga magsugo sa imong silingan nga mo-undergo og DNA test. Kining maong kamandoan usually anha sa konteksto sa usa ka petition for recognition nga i-file nimo on behalf sa imong anak.

Sa kaso nga Lucas v Lucas, mihatag ang Supreme Court og standard kanus-a mapagawas ang maong kamandoan: kinahanglan dunay prima facie evidence nga ang giingong amahan mao gayod ang amahan sa bata. Kaning prima facie evidence, ebidensya ni nga on its face, moestablisar nga iya gayod anak ang bata, subject sa rebuttal evidence niya. Mahimo mong magamit ang mga text o chat messages ninyo, labi na gayod kadtong klaro nga nagkasabot nga maghilawas mo panahon sa pag-conceive sa bata. Of course tagaan sab siyag chance to prove otherwise, pananglitan vasectomy report o sperm count test sa panahon sa pag-conceive.

Hinaot nakatabang kini kanimo.

– Atty. Vince

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.