Brigada Balaod

Ex buot mobawi sa iro

Dear Brigada Balaod,

Ako diay si Maria. May trato ko sa una apan ako nang gibuwagan kay gawas nga minyo diayng dako, mangulata pa gyod nako. Nangabit pa gyod mora ra bag dako ang iyaha. Ang akong pangutana, Brigada Balaod, kabahin sa iro nga iyang gihatag kanako isip unta to peace offering dihang buot siya makigbalik. Gidawat nako ang iro kay cute man pero wa na ko makigbalik niya. Karon nagsige siyag sinamok kay ipauli ang iro. Gipatawag na ko niya sa barangay apan wa mi nagkasabot didto. Sa wala pa ang covid, nakadawat kog summons gikan sa korte kay patubagon ko sa kasong replevin bahin sa iro. Giingnan hinuon ko sa korte nga igkahuman na lang sa ECQ bawsan. Karon kay nahuman na man ang ECQ unya nabasahan man nako ang imong numero sa Brigada Newspaper, mangutana unta ko kon unsay angay nakong buhaton. Salamat.

– Maria

***

Dear Maria,

Ang kasong replevin nga imong giatubang karon usa ka civil case alang sa pagbawi sa usa ka personal property, sama sa iro. Mahalon gyod tingali ning maong iro kay migasto man gyod og abogado ug pag-file sa kaso ang imong ex.

Ang dugokan sa kasong replevin mao kon kinsa gayoy tag-iya sa kabtangan. Ang iro wala gi-require nga irehistro sa balaod, busa kon unsay material ug relevant evidence maoy dawaton sa korte. Bisan wa ko kabasa sa petition, sure nako nga iyang gibutang didto nga wala makompleto ang donation sa iro dihang “gihatag” niya kini kanimo isip peace offering. Tingali ang iyang ikatarungan mao nga wa mo man siya pasayloa ug wa man mo magbalik. Pero sa tan-aw nako lisod niya kining iprobar. Ikaw, on the other hand, magamit nimo ang mga ebidensya nga kamo na gyoy nagbuhi sa hayop human ang usa ka date certain. Dinhi magamit nimo ang mga picture o bisan ang vaccination records.

Kon qualified ka sa serbisyo sa Public Attorney, duol sa ilang opisina. Otherwise, kinahanglan ka modangop og pribadong abogado.

Ayaw kaayo kabalaka kay sa akong tan-aw mas dakog tsansa nga magmadaogon ka. Besides, maglisod na pod nag adjust ang iro kay dako na nag edad. Kon ang huwes dog lover, di na niya i-award sa imo ex.

Hinaot nakatabang kini kanimo.

– Atty. Vince

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.