Brigada Balaod

Ibaligya ang tindahan

Dear Atty. V,

Tungod sa hapit tulo ka bulan nga nasirado ang among gamayng karenderya, nagplano mi sa akong misis nga ibaligya na lang kini. Duna na pod mi nakit-an nga willing mopalit. Mangutana unta mi kon unsay gikinahanglan namong mga dokumento pagpakita nga amo nang nabaligya ang maong karenderya.

Daghan kaayong salamat.

– James

****

Dear James,

Ang usa ka negosyo usually naglakip sa goodwill ug business name, ug ingon man sa mga physical assets niini. Depende sab ninyo kon ang lugar giapil ninyo sa pagbaligya, ug unsay sitwasyon niini (inyoha ba ang yuta, o inyoha ang building, o nag-abang lang mo).

Ang goodwill ug business name, usually ato ipabalhin pinaagi sa giingong Deed of Assignment of Rights. Mora ni siya og Deed of Sale, apan tungod kay rights ra may gibaligya, kana nga porma ang atong gamiton.

Ang mga physical assets sa karenderya (kubyertos, kaldero, lamesa, lingkoranan) kon apil sa inyong gibaligya, mahimong ilakip lang pag-mention sa Deed of Assignment of Rights. Apan kining mga butanga walay espesyal nga paagi sa pag-ila kinsay nanag-iya nila; ang naghupot nila maoy tag-iya.

Kabahin sa lugar: kon nag-abang ra mo, kinahanglan tingali ipananghid ninyo sa tag-iya sa lugar, kay sagad sa mga lease contract wala maglakip sa proviso nga pwede ninyo i-assign ang inyong bahin sa lease. Kon inyo ang building nga gigamit, kinahanglan ni og laing Deed of Sale; gikinahanglan nga i-declare for taxation purposes ang building aron naay reference.

Hinaot nakatabang kini kanimo.

– Atty. V

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.