Brigada Balaod

Gikiha sa opisyal

Dear Atty. V,

Tawga lang ko sa ngalang Michelle. Tungod sa kalisod sa panginabuhi tungod niining COVID, nangyawat intawon ko nga makadawat sa hinabang gikan sa DSWD o sa DOLE ba kaha. Apan subo nga palandongon nga wala gyoy bisag usa na lang ka dako nga naabot sa akong mga kamot. Sa akong kapungot, kausa niana, gi-share nako ang picture sa among mayor nga gi-post sa Facebook page sa among lungsod ug akong gipakapinan og komentaryo, “Gahalhal lang kang tawhana ka, bweset ka. Nganong mibotar ba sad mi nimo uy.”

Human niadto nadunggan nako nga gipangita kuno ko sa mga pulis kay dakpon kay cyberlibel kuno ang akong gibuhat. Apan wala ko nila makit-i kay mitago ko didto sa akong kaila sa pikas barangay. Human nalinaw-linaw, mibalik ko sa amoa apan kagahapon lang gyod, nakadawat ko sa subpoena nga gipadala kanako via Messenger.

Mangutana unta ko Attorney kon balido ba kini ang pagpadala og subpoena sa Messenger. Kinsa man poy maduolan nako bahin ning akong kaso, ug mapriso ba gyod ko ani?

Salamat.

– Michelle

*****

Dear Michelle,

May mga prosecution offices karon nga naggamit na sa e-subpoena ug ipaagi na sa email o sa Facebook Messenger ang mga subpoena. Ang gibasehan nila sa maong procedure ang mga issuance sa Department of Justice, apan ang atong Rules of Court diin makita ang procedure sa preliminary investigation gikan sa Supreme Court, ug, as far as I know, wala magpagawas og bag-ong kamandoan ang Supreme Court sa maong procedure. Pero bisan na, dawata na lang na ug bawsi, kay kon di na nimo dawaton, dalhon ra man gyapon na nila sa korte.

Mahimo nimong idangop sa Public Attorney’s Office o PAO ang imong kaso aron matabangan ka. Pagdala lamang og Certificate of Indigency gikan sa barangay.

Gamay ra kaayo og tsansa nga mabilanggo ka sa maong hitabo. Alang kanako, dili libel ang pag-share nimo sa dagway sa inyong mayor ug pag-komentaryo, “Gahalhal lang kang tawhana ka, bweset ka. Nganong mibotar ba sad mi nimo uy.” Dili man na defamatory. Kanang “gahalhal” expression na kana sa probinsya, kauban sa “naprapra” ug “naamaw”. Ang “bweset” usa usab ka balikas ug dili necessarily defamatory. Usa pa, unless matataw nga malicious ang imong pag-post sa ingon, ma-dismissa ang kaso kon walay malisya.

Hinaot nakatabang kini kanimo.

— Atty. V

*****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.