Brigada Balaod

Pabayron sa nabanggaan

Dear Atty. V,

Ako si Judith, taga Bantayan Island. Magpatambag unta ko nimo Atty. Bahin kini sa ako mister. Nakadisgrasya siya niadtong 2018 diri sa Bantayan. Nag-drive og traysikol ang ako mister ug ang nagmotor kalit midumbol sa atubangan sa traysikol. Mao nga wala mahitsura ang atubangan sa traysikol namo.

Unya Atty., mianha sa Cebu City ang nagmotor kay nabuak ang pantog ug gipabayad mi sa katunga  sa gasto sa ospital. Ang amo kasabotan gipanotaryohan gyod Attorney. Pabayron mi og tag usa ka libo ka pesos matag bulan.

Ang ako pangutana Attorney, makabayad ba gyod mi karon nga ang akong anak naa man sa Vicente Sotto na-admit mag-usa na ka bulan, ug ang akong mister tag tulo na lang ka pasahero tungod sa social distancing sa COVID-19. Dili sila pabalibad moingon dayon sila nga isumbong mi nila sa abogado nga nagnotaryo.

Palihog mangayo ko sa bulawanong tambag. Salamat ug magpaabot ko.

– Judith

****

Dear Judith,

Una sa tanan, panghadlok lamang kanang giingon nila nga mosumbong sa abogado nga nagnotaryo. Mas dakog tsansa nga ang trabaho sa maong abogado mao lamang gayod ang pagnotaryo sa inyong kasabotan. Mahimo pong lakip ang pagdukdok niini, apan kon mokuha sila sa maong abogado, lain kanang bayranan.

Ang kasabotan taliwala sa imong bana ug sa nakadumbol mahimong balaod taliwala nila. Sa imong hisgot, dili man unta sala sa imong bana ang nahitabo, apan kon nganong mipirma siya sa kasabotan, siya ray nakahibalo. Pwede ninyong hulaton nga mokiha sila aron makwestyon ninyo ang kasabotan, pero sa akong tan-aw maglisod na mo niana. Hinuon, wala kana magpasabot nga mapugos kamo pagpabayad, labi na sa sitwasyon karon.

Kon wala gayod kamoy ikabayad ug dili gayod sila mahangyo nga inigkahuman na lamang niining emerhensiya, mapugos sila pagdangop sa korte aron ang korte ang moorder kaninyo nga bayaran ug mangita og kabtangan nga maoy gamiton pagbayad.

Hinaot nakatabang kini kaninyo.

– Atty. V

****

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.