Brigada Balaod

Mas bongga ang anak sa kabit

Dear Brigada Balaod,

Ako si Jane, minyo ug naay duha ka anak pero buwag sa bana. Ang ako bana regular iya trabaho pero PHP 1,500.00 ra ang iya hatag sa duha ka bata. Sakto ba nga kani ra amo makuha gikan niya? Kasado mi. Naa ra ba siya anak sa lain babaye nga mas bongga ang anak sa iya kabit kay sa amo anak. Please tambagi unsa angay namong buhaton.

*

Dear Biniyaang Asawa,

Sakit gyod na palandongon nga mas bongga pa ang pag-amuma sa imong bana sa iyang anak sa iyang kabit kaysa inyong mga anak nga maoy lehitimo niyang mga anak.

Bisan kon wala nimo gi-mention kon pila ang sweldo sa imong bana, apan tataw nga kulang kaayo ang PHP 1,500.00 sa usa ka bulan alang sa duha. Bisan kon wala koy anak mismo, apan naa koy mga pag-umangkon ug sayod ako unsa ka gastoso ang pagpadako sa bata.

Ang atong balaod wala gyod mag-ingon kon pilay angay isustento. Ultimately, ang korte maoy mohukom pila ang angay nga isustento. Ang pipila sa mga factor nga i-consider mao kining mosunod: pila ang kita sa imong bana, ang panginahanglan sa imong mga anak, pila ang imong kita (kay angay man pod kang mosustento sa inyong mga anak), kinsa pa ang ubang sustentohanan sa imong bana (may obligasyon usab siya sa iyang anak sa gawas, apan wala sa kabit), ug uban pa.

Ang akong sugyot kanimo, duol sa Public Attorney’s Office (PAO) sa inyong lugar, pagdala daan og certificate of live birth sa inyong mga anak, contract of marriage o marriage certificate, certificate of indigency gikan sa Local Social Welfare Development Officer ug barangay, government ID, ug sumada sa gasto sa mga bata sa milabayng tulo ka buwan. Sagad ang PAO naa mahimutang kon asa ang inyo mga korte. Kon duol ra ka sa Dakbayan sa Sugbo, mahimo usab nga adto ka duol sa Legal Alternatives for Women (LAW) Inc. sa Elda Apartelle, Echavez St., o di ba kaha sa Children’s Legal Bureau (CLB) sa No. 10 Queen’s Road, Camputhaw (luyo sa Iglesia ni Cristo duol sa Mango).

Hinaot nakatabang kini kanimo.

– Atty. Vince

**

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.