Brigada Balaod

Papahawaon sa balay

Dear Atty. V,

Naa koy napalit nga balay. Ang tag-iya kay uyoan sa akong asawa nga namatay na. Sa wala pa namatay kami ang gibinlan sa balay nga napalit na nako ug nakapirma pod ang tag-iya sa balay. Lima sila ka managsuon puros namirma sa kasabotan. Karon naay usa ka igsuon nga babaye iya gihapon angkonon ang balay nga ang naggasto ang namatay nga igsuon nga sila tanan nakapirma na sa kasabotan. Please tabangi ko Atty. V. Salamat.

***

Dear Texter,

Sa imong sugid, tataw nga kamo na sa imong asawa ang tag-iya sa maong balay. Sa ato pa, walay makapapahawa kaninyo diha gawas na lamang pinaagi sa kamandoan sa korte. Ang igsuon sa uyoan sa imong asawa nga nangangkon sa balay maoy may kaakohan sa pagpadangat sa kaso ngadto sa korte, ug kamo sa imong asawa angay lamang nga maghuwat sa maong kaso.

Ang pinirmahan ninyo nga dokumento, bisan pag dili notarized, usa ka kusganon nga ebidensya nga nabaligya na ang balay. (Ang akong sugyot, sa sunod nga duna kay paliton nga real estate sama sa balay ug yuta, ipa-notarize gayod ang dokumento.)

Lain nimong mahimo aron mas kusganon ang imong pagpanag-iya sa balay mao ang pagdeklara niini for tax purposes ubos sa imong ngalan. Kon wala pa kini madeklara, o nadeklara sa ngalan sa namatay nga uyoan, adto ang Local Assessor ug pangutan-a sa proseso diha sa inyong lugar.

Wala nimo hisgoti kinsa ang tag-iya sa yuta, apan bisan pag sa kaliwat kini sa uyoan sa imong asawa, dili awtomatiko nga ilaha ang balay. Hinuon managlahi ang rules kon pananglitan in good faith or in bad faith ang pagtukod sa balay diha sa maong yuta. Kon co-owner siya sa maong yuta, in good faith siya sa pagpahimo sa balay ug bisan kon mapapahawa kamo, may obligasyon ang mga tag-iya sa yuta nga mo-reimburse kaninyo (most likely moingon ang korte nga basi lamang sa pilay inyo gibayad ug ang kantidad sa useful and necessary improvements ninyo). Kon in bad faith ang uyoan, mapapahawa gayod kamo, apan moagi pa kini og buruka.

Ang angay nimong himoon karon mao ang pagseguro nga ang tax declaration sa balay anaa sa imong ngalan.

Hinaot nakatabang kini kanimo.

– Atty. V

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog. Walay bayad ang pagtubag sa inyong mga pangutana. Kanunaya lamang ang pagpalit sa atong Brigada Newspaper.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.