Brigada Balaod

Ipabalik sa apelyido sa inahan

Brigada Balaod 2022.02.26 (Wednesday)

IPABALIK SA APELYIDO SA INAHAN

Good afternoon Atty. Vincent. Mangayo unta kog legal advice kanimo kabahin ni sa akong mga anak Atty. Ang akong ka-live in sa una kay usa ka minyo nga lalaki pero buwag sa asawa. Kasado siya sa iyang asawa. Nakaanak mig 6 Atty. Last year month of September 14 iyaha na gikuha ang 5 ka bata kay ang ika-6 naa sa akong Lolo man.

Ug karon gusto unta nako nga ibalhin sa akong apelyido ang mga bata. Pwede ba nako nga mabalhin sa akong apelyido Atty.?

Usab sugod September hangtod karon wala na siya mo-support og gatas ug diaper sa akong anak nga naa sa akong Lolo. 2 years old na. Ang mi-provide sa gatas, vitamins, diaper, ug sabon ug uban pang needs sa bata kay akoa auntie nga dalaga pa.

Unsay angay nakong buhaton Atty.? Palihog tambagi ko.. Ako diay si Mea. Taga Medellin, Cebu.

*

Dear Mea,

Ubos sa atong balaod, ang mga illegitimate children kon mga anak gawas sa kaminyoon, sama sa imong mga anak, may katungod nga mogamit sa apelyido sa ilang amahan. Usa kini ka lakang aron masama lamang ang status sa mga legitimate ug illegitimate children.

Sa practice, ang mga bata nga ilhon sa ilang amahan magdala sa apelyido sa ilang amahan. Kon buot mong ang mga bata magdala sa imong apelyido, mopasang-at ka og kaso ngadto sa hukmanan aron ang imong apelyido ang gamiton sa mga bata. Ang kaso imong isang-at isip representante sa imong anak. Hinuon, sa akong experience, akoy nangabogar sa amahan ug sa akong tan-aw kon sakto lang gyong pagkarason ngadto sa korte, i-deny gayod ang pagpangayo nga ang apelyido na sa inahan ang gamiton. Kini tungod kay katungod man sa bata ang paggamit sa apelyido sa amahan. Unya ang ato pong prinsipyo sa balaod ang best interest of the child. Kon imong hunahunaon, mas haom para sa bata nga ang apelyido sa ilang amahan ang gamiton imbes nga imoha. Ang atong katilingban ubos pa gihapon og pagtan-aw sa mga illegitimate children, ug usa sa mga timailhan sa illegitimate children mao nga naggamit sila sa apelyido sa ilang inahan.

Sa ikaduha mong pangutana, may katungod ka nga mangayo og sustento alang sa bata. Kon pila kini magdepende sa daghang factors: pilay kita sa amahan, si kinsa pa ang kinahanglan niyang sustentohan, pilay imong kita, kinsa pay imong sustentohanan, pilay actual nga panginahanglan sa bata, ubp. Ang labing maayong buhaton mo mao ang pag-adto sa opisina sa Public Attorney’s Office sa Bogo City nga naa mahimutang sa Bogo Hall of Justice sa Brgy. Dakit. Pangitaa si Atty. Aileen Pepito.

Hinaot nakatabang kini kanimo.

– Atty. Vince

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.