Brigada Balaod

Mo-resign sa trabaho

Brigada Balaod 2022.02.25 (Tuesday)

MO-RESIGN SA TRABAHO

Maayo gabie Atty. Vince. Usa diay ko sa tigpaminawan sa Brigada News FM ug tigpalitan og Brigada Newspaper. Ako diay si Joebert. Aduna lang koy pangutana nimo kabahin sa akong trabaho. Nagtrabaho ko sa usa ka private company diri sa Cebu og 9 months nako karong bulana ug nagplano ko nga mo-resign kay dli enough akong sweldo diri. Aduna nakoy gi-applayan nga laing company ug nagplano nako nga mo-resign ko next week sa akong gitrabahoan karon. Matod pa sa akong kauban nga mo-render pa kuno ko og 1 month usa ko makahawa sa company igo nga makakita sila ug puli nako.

Unang pangutana Atty., pwede ra ba ko nga dili na mo-duty after 1 week sukad sa akong pagpasa og resignation letter?

Ikaduha, makabuot ba ang company kon dili na ko mo-duty bisag wala pay 1 month human ko mo-pass og resignation letter?

Ikatulo, aduna ba koy madawat sa company tungod kay 9 months na man ko?

Salamat sa pagbasa ug maayong gabii.

– Joebert

*

Dear Jobert,

Sa pagdawat mo sa trabaho, imong gibaligya ngadto sa imong employer ang imong oras, ug lakip sa maong kasabotan mao ang 30 ka adlaw nga ihatag mo nga lead time sa imong employer aron makakita og mopuli nimo ug makaandam og proper nga turnover. May mga instances hinuon nga pwede ang empleyado mobiya diha-diha apan morag wala kini sa imong sitwasyon: serious insult to the honor and person of the employee; inhuman and unbearable treatment accorded the employee by the employer or his representative; crime committed against the person of the employee or any immediate members of the employee’s family; ug other similar causes.

Ang tubag sa una mong pangutana, pwede, apan mahimo kang pabayron og damages.

Sa ikaduhang pangutana, makabuot in the sense nga makabayad kag damages, apan dili makabuot in the sense nga ipapriso ka o guyoron ka sa trabahoan.

Sa ato pa, mahimong mopasaka og kaso batok kanimo ang imong kompaniya aron pabayron ka og damages sama sa gasto sa pagpangita og puli nimo, cost of training sa puli nimo, ug actual damage (pananglitan produkto nga wala mahatod) tungod sa imong pag-AWOL.

Mas angay gayod nga estoryahan mo og tarong ang inyong HR ug ingon man ang HR sa sunod mong kompaniya. Best case scenario, magkasabot kamong tulo og win-win solution. Worst case scenario, masuko ang current nimong employer apan mabalhin gyod ka sa bag-o nga makasabot nga usa ka empleyado nga mosunod gayod sa rules, o di ba kaha di na ka dayonon pag-hire sa bag-ong kompaniya.

Sa ikatulo mong pangutana, wala kay madawat nga separation pay gawas kon nakabutang kini sa inyong kontrata, apan madawat gihapon nimo ang proportional 13th month pay.

Hinaot nakatabang kini kanimo.

– Atty. Vince

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.