Brigada Balaod

Yuta gibaligya, wala kapirma ang anak

Dear Atty. V,

Mangutana lang ko. Kon ang yuta gibaligya unya wala kapirma ang tanang anak, pwede ba mabawi? Hangtod karon ngalan pa gihapon sa amo apohan ang title. Unsay angay namo buhaton Atty.?

Upat ka ektarya ang gidak-on sa yuta unya gipalit lang og PHP 700.00. Sa siyam ka magsoon, usa ra ang nakapirma. Sa siyam ka magsoon, upat pa ang buhi. Paralized na ang usa. Ang ako mama buhi pa sab. Ang nakapirma buhi pa sad.

Salamat kaayo.

***

Dear Apo,

Wala kaayo maklaro sa imong text kon kinsay nagbaligya sa yuta, ug unsay status sa maong yuta.

Kon ang maong yuta conjugal property sa imong mga apohan, ug buhi pa silang duha sa ila kining gibaligya, balido gayod ang maong pagbaligya, bisan pa gali og walay bisan usa ka anak nga nakapirma.

Kon ang maong yuta exclusive property sa usa sa imong apohan, ug buhi pa siya sa pagbaligya, balido usab kini, bisag wala pa mananghid sa iyang mga anak.

Apan kon ang maong yuta gibaligya nga patay na ang imong mga apohan o usa kanila kon conjugal property kini, o ang tag-iya niini kon exclusive property kini, gikinahanglan ang pirma sa tanang anak, ug sa buhi pa nga spouse. Sa maong sitwasyon, ang nabaligya sa imong uyoan mao lamang ang iyang share sa maong yuta.

Ang labi nimong maayong buhaton moduol gayod ikaw og abogado aron matan-aw ang inyong mga papeles. Kining atong tambag binase lamang sa imong gipahibalo og limitado kaayo.

Dili ako makahatag og opinyon kabahin sa presyo kay wala man nimo gi-mention kanus-a nahitabo ang pagbaligya.

Hinaot nakatabang kini kanimo, bisan kon haguka kaayo tungod usab kay limitado kaayo ang impormasyon nga imong gipadangat.

– Atty. Vince

***

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.