Brigada Balaod

Anak napriso sa drugas

Brigada Balaod 2020.02.17 (Monday)

ANAK NAPRISO SA DRUGAS

Maayong buntag Atty. Vince. Naa unta koy ipangutana kabahin sa akong anak nga napriso sa drugas. Mag-8 months na ka duha ra siya na-hearing unya na-drug test na sad. Makagawas na siya kon mahuman na ang iyang drug test? Naka-file na man siya og plea bargaining. Daghang salamat. Sa Mandaue diay ko. Sa Brigada Newspaper ko nakakita sa imong number.

Dear Ginikanan sa Napriso,

Wala nimo gihisgotan kon pilay gisilot sa imohang anak ug ingon man unsa nga kaso sulod sa R.A. 9165 ang gipasingalan sa imong anak. Ang Section 5, pagpamaligya, nga may silot nga life imprisonment, mahimong i-plea bargain sa Section 12 kon ubos sa un gramo nga shabu. Ang Section 12 ubos sa unom ka tuig nga pagkabilanggo ang silot. Ang Section 11, paghupot, mahimong i-plea bargain sa Section 12 kon ubos sa singko gramo nga shabu.

Kon ang total nga pagkabilanggo ubos sa unom ka tuig, mahimong mo-apply sa probation. Kon kalipikado, serbisyohan niya ang silot pinaagi sa pag-report sa probation officer apan gawasnon na siya.

Akong i-assume nga sa Mandaue usab ang kaso. Unfortunately, grabe ka-overwhelmed sa mga kaso ang atong mga regional trial court sa Mandaue City karon. Ang resulta, matag tulo o upat ka bulan ang hearing sa kaso.

Human unya sa drug dependency examination (nga ang drug test nga imong giingon kabahin), makita kon iadto ba sa rehabilitation center o community-based rehabilitation ang angay buhaton sa imong anak.

Hinaot nga nakatabang kini kanimo.

– Atty. Vince

*

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.