Brigada Balaod

Yutang giprenda

Brigada Balaod 2020.02.16 (Sunday)

YUTANG GIPRENDA

Good morning Sir. Nakabasa ko sa Brigada Newspaper. Naa mi yuta nga kabilin sa amo apohan. Unya ang titulo kay giprenda man sa ako uyoan. Ang titulo tua sa giprendahan iya gihatag. Ang nagpabilin niya ang deklarasyon na lang. Unsa man ang angay buhaton ani? Nangamatay na ra ba ang nagpuyo, ang ginikanan ug ang anak. Ang giprendahan kay ila dayong gitukoran og balay ang yuta. Ako apo lang. May katungod pa ba ang apo nga manggilabot kay diha man ko nagdako sa ako lolo olunya karon patay na man siya. Palihog tambangi ako unsay angay buhaton.

*

Dear Apo sa Ginganlan sa Titulo,

Ang una mong buhaton mao ang pag-adto sa Register of Deeds aron pagsuta kon sa imong apohan pa ba gihapon nakangalan ang titulo. Pangitag paagi nga makakuha kas numero sa titulo, ug pangayo og certifies true copy. Kon ang titulo kanselado na, padayona pagpangayo ang mga certified true copy sa mga anak ug apo nga titulo hangtod maabot kas current nga (mga) titulo.

Kon naa pa kini sa ngalan sa inyong apohan, angay kang moduol og abogado aron mopasaka og kaso aron pagpasurender sa titulo gikan sa naghupot niini. Didto sa maong kaso tagaan og kahigayonan ang naghupot sa titulo nga modepensa nganong magpabilin sa iyaha ang titulo; kon makita sa korte nga wa siyay rason, ipauli ang titulo ngadto kaninyo.

Kon wala na sa ngalan sa inyong apohan ang titulo, angay sutaon giunsa kini pagkabalhin. Kon pinaagi sa pagbaligya, apan wala gayod kini gibaligya sa imong apohan, mahimong ipakanselar ang titulo nga bag-o. Adto gihapon kini sa korte burukahon.

Angay hinumdoman nga gidili sa balaod ang awtomatikong pagkabalhin sa yuta ngadto sa nagpautang. Hinuon sa akong experience, may mga “prenda-palit” nga sale with option to repurchase diay. Pero bisan pa, ang mabaligya sa imong uyoan ang iyaha lamang share sa yuta, dili ang tibuok yuta.

Kon mapamatud-an nga inyoha pa gihapon ang yuta, mahimong mapapahawa ang mga nagpuyo niini bisan pa kon nakapatarok na sila og balay niini. Hinuon basin may bayranan mo sa danyos sa pagguba sa ilang balay, depende kon in good faith or in bad faith ba sila.

Kon patay na ang imong ginikanan nga maoy anak sa imong lolo, may direktang katungod ka na sa yuta. Apan kon buhi pa, ang paggiya lang usa sa ilaha og unsay balaod ang imong mahimo.

Hinaot nakatabang kini kanimo.

– Atty. Vince

*

I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.

4 thoughts on “Yutang giprenda”

  1. Maayong gabii.. Mangutana unta ko regarding sa among yuta nga naprenda..10years ang tagal niya for 200k..naghangyo ko sa akong giprendahan kung pwede ba ko magdugang kay needed ang money..nidugang sya ug 100k pro iyang ingon prenda palit na kuno..kay iyang gusto paliton ang loye nga 1 hectare ug 400k ra..ana pa gane sya anytime pwede daw lukaton..pero karon hapit na mahuman ang term gusto unta nako lukaton..pero dili na niya ipalukat kay prenda palit kuno..pero wala man pud koy gipirmahan..pwede mangutana sa saktong definition sa prenda palit..ug pwede pa ba nako malukat ang maong lote? Daghang salamat sa pagtubag..

  2. Atty. Ang yuta sa akong lola Ge prinda sa iyang
    Umagad na Babaye.
    Ug naa sa kasulatan na prenda – palit daw.
    50yrs na ang nilabay karon pajud mi nakabalo aning yuta sa among ninuno. Naa pa ang ilang kasulatan pero ang nag gunit kay laing tawo nasad kay gi prenda naman sad d ai ug laing tawo d. Ai.
    Makuha pa namo ang yuta? Naa pa ba mi ka tungod ato? Ang declaration ngalan gihapon sa among ninonu pa.
    Salamat atty.
    God bless

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.