Brigada Balaod

Panahon na nga himoong legal ang habal-habal

Ubos sa Republic Act No. 4136, ang atong Land Transportation and Traffic Code, ang matag motor vehicle sa Pilipinas, lakip na ang mga motorsiklo, anaa sa usa sa upat ka classification: private, for hire, government, ug diplomatic. Ang mga “For Hire” nga motor vehicle, kadtong dunay certificates of public convenience (CPC) o special permit (SP) nga giisyu sa Land Transportation Franchising and Regulatory Board (LTFRB).

Tungod kay wala may CPC o SP alang sa mga single taxis o kining mga single nga motorsiklo nga manguha og pasahero nga mas nailhan nato sa ngalan nga habal-habal, dili gayod marehistro as “For Hire” ang maong mga motorsiklo. Ubos sa mao gihapong balaod, gidili ang paggamit sa mga pribadong sakyanan isip “For Hire”.

Sa mubong pagkasulti, ang mga habal-habal nato, gikan pa kaniadto hangtod karon, illegal ang status, as far as the law is concerned.

Pero di man unta kini mahimong national issue, kon wala pa mosulod ang Angkas, nga usa ka kompaniya nga naghatag og kahigayonan sa mga drayber ug mga manakayay nga magkasabot ug magkaabot pinaagi sa Internet, dili sama sa orihinal nga habal-habal diin moadto gyod ka sa eskina o diin dapit sagad magpundo ang mga habal-habal.

Hinuon, karon nga national issue na kini, mas maayo tingali nga padayonon ang paghisgot. Ang tanan nasayod unsa kadakong tabang ang mga habal-habal sa atong kabukiran diin bati pa kaayo ang mga karsada ug motor lamang ang makasulod. Gani ang mga habal-habal, gamit usab kaayo sa mga dakbayan ug urban areas tungod sa trapik, kay makalusot-lusot man sila. Ang bugtong hinungdan nga illegal ang habal-habal mao nga ang kagamhanan wala mag-issue og mga CPCs alang kanila.

Kon akoy pangutan-an, panahon na nga himoong legal ang mga habal-habal, ug ang pag-manage kanila ihatag ngadto sa mga local government units (LGUs), sama sa mga traysikol ug trisikad. Ang bugtong rason lamang gayod nganong kinahanglang manginlabot ang kagamhanan sa atong transport system mao ang pagseguro nga ang publiko dunay mahimo kon ang involved sa transport system dunay mahimong sayop. Sa akong tan-aw, mahimo kining maong papel sa LGUs.

Gusto man o dili sa kagamhanan, ang mga habal-habal gamit ug padayong gamiton sa katawhan. Walay rason nga magpabilin silang illegal.

Alang sa inyong mga pangutanang legal, mahimo kamong mo-text sa 0916-664-7624.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.