Brigada Balaod

Temporary plate

Sayod kita nga hangtod karon wala pa gyod magukod sa Land Transportation Office (LTO) ang backlog sa mga plate number sa sakyanan, mapa-motor man o four wheels.

Ang atong higala sa media nga si Rene Ugsimar Borromeo mipadangat og reklamo sa iyang Facebook account kabahin sa paggamit og temporary plate sa mga motor nga managpareha. Gipakita niya ang pictures sa duha ka motor nga pareha gayod og plate number (070106).

Mitimang kita nga temporary plate number kini nga gi-release sa LTO. Sa ato pa, walay sayop ang tag-iya sa motor.

Dunay Unnumbered Memorandum gikan sa LTO pinetsahan Enero 11, 2017 nga nag-set og unsay temporary plate number. Matod sa maong Unnumbered Memorandum, sa mga four-wheel vehicles, and conduction sticker ang temporary plate number. Apan alang mga motorsiklo, used imported, ug rebuilt motor vehicles, ang file number maoy temporaryong gamiton isip plate number.

Ang problema, kay sa pro-forma nga authorization nga giisyu sa LTO Region 7 (basi sa akong mga motor nga na-rehistro dinhi), ang gigamit nga plate number dili ang motor vehicle (MV) plate number. Kon wa ko masayop, ang ilang pattern consistent nga “0701” (code sa LTO 7) nga sundan sa two digit month number (pananglitan 03 alang sa Marso). Sa ato pa, ang tanang motor nga naisyuhan og Authorization niadtong March 2019, pulos 070103 ang plate number.

Ang Authorization may tatak nga “Valid until receipt of regular plate.”

Kon mao gyod kini ang standard, nan dunay LTO regulation nga mi-modify sa Enero 11, 2017 nga memorandum. O kon mao gyod kini ang interpretation nila sa ilang regulasyon, pwede ra pod.

Apan may punto si Bay Rene nga ang paggamit aning maong sistema pwedeng makahatag og problema. Gikan pa sa sinugdanan ang paggamit og plate numbers alang sa mga sakyanan sa dalan gigamit aron mailhan ang sakyanan. Apan kon daghan ang sama ra og plate number, unsaon pa man nato pag-ila ang usa ka sakyanan gikan sa lain? Naay moingon nga magamit kuno ang kolor o brand ug model sa sakyanan. Tingali ang kolor dali mahinumdoman, apan ang brand ug model, lisod na kay pipila lamang ka tawo ang makaila gayod sa mga popular nga brand ug model.

Maayo unta og mahataganan kinig solusyon sa LTO.

Alang sa inyong mga pangutanang legal, text sa 0916-664-7624.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.