Brigada Balaod

ICAD co-chair report

Niadtong Lunes, Enero 6, 2020, gipagawas ni Vice-President Leni Robredo ang iyang report isip ICAD Co-Chairperson.

Kahinumdoman nga gitudlo ni Pres. Rodrigo Duterte si VP Leni isip co-chairperson sa Inter-agency Committee on Anti-Illegal Drugs (ICAD) apan gipotbol ra pod human sa 18 ka adlaw.

Kining ICAD gimugna pinaagi sa EO 15 niadtong 2017 aron maoy mo-coordinate sa anti-illegal drugs nga estratehiya sa kagamhanan. Ang chairperson niini mao ang Director-General sa Philippine Drug Enforcement Agency (PDEA).

Mubo ra baya ang report, apan undanon kini. Giila ni VP Leni ang mga problema sa atong anti-illegal drugs campaign ug may mga sugyot siya alang sa pagsulbad sa maong problema.

Ang unang problema ang setup sa ICAD mismo. Wala kini strategic leadership. Iyang gisugyot nga ang chairman sa Dangerous Drugs Board dili ang PDEA Director General ang angay himoong chair sa ICAD. Ang DDB man god unta ang angay mag-set atong anti-illegal drugs strategy, samtang ang PDEA ang mo-implement sa law enforcement. Wala pa poy na-appoint nga kumander sa National Anti-Illegal Drugs Task Force nga gimugna sa EO 15 pod.  Iya usab nga gisugyot nga ilakip sa ICAD ang mga civil society organizations ug local government units.

Ang laing problema mao nga wala diay kitay baseline data. Sa ato pa, wala gyod ta makahibalo unsa ka langyab ang problema sa druga. Of course duna tay ideya, apan wala kini ma-measure. Sa science pa, you can’t deal with what you cannot measure. Ang sugyot ni VP Leni, kompletohon ang baseline data unya pangitaag paagi ang pag-track sa mga nadakpan o misurender. Kini hinuong puntoha sa tracking morag dili ko mouyon, kay alang kanako kon naserbisyohan na sa kriminal ang iyang salaod, wala nay katungod ang estado nga mo-profile kaniya.

Ang atong drug war, focus kaayo sa gagmay ug wala kaayoy naigo nga dagko. Kini daghang mouyon niini. Usa sa mga sugyot ni VP Leni mao ang pag-institutionalize sa community-based rehabilitation programs.

Kabahin sa tokhang, nahimo na kining synonymous sa extrajudicial killings. Gisugyot ni VP Leni nga undangon na ang tokhang. Unya sa mga police operations, gamiton ang body camera aron ma-review ang mga panghitabo. Katong mga pulis nga tuyo gyod mopatay, angayang taralon sa hukmanan.

Ang labing gikagubtan nga punto ni VP Leni mao nga may “massive failure” ang kagamhanan sa pag-constrict sa supply sa drugas. Tiaw mo bay less than 1% sa estimate drug volume ang na-intercept sa atong law enforcement. Ambot wa ko kasabot nganong perting tagawtaw sa ubang tawo aning puntoha nga ang data gikan ra man pod sa atong law enforcers. Gisugyot ni VP Leni ang pagdugang og mga equipment sama sa x-ray machines, ingon man mga K9 units.

Mubo ra baya ang maong report og accessible kaayo basahon. Mahimo kining ma-download sa Internet. Maayo unta og kadtong mobasa niini i-let go lang usa ang dilawan v. dds nga mentality ug sabton ang maong report sa konteksto nga ang atong problema sa druga angay aksyonan, ug duna pay mahimong improvement sa giunsa kini pagsulbad karon.

Alang sa inyong mga pangutana, text sa 0916-664-7624.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.