Brigada Balaod

Ampatuan: Guilty!

Niadtong Disyembre 19, 2019, gipagawas sa Quezon City Regional Trial Court (RTC) Branch 221 ang desisyon sa 58 ka murder cases batok sa 99 ka mga akusado sa Ampatuan Massacre nga nahitabo niadtong Nobiyembre 23, 2009.

Kahinumdoman, lapas sa usa ka dekada kanhi, 58 ka mga tawo ang gipatay didto sa Ampatuan, Maguindanao, 32 kanila sakop sa media.

Gitumbok ang banayng Ampatuan nga maoy nagpaluyo ug nagbuhat sa maong pagpatay. Ang kaso gibalhin sa Quezon City ug gi-constitute ang usa ka regional trial court (RTC) isip special court nga ang maong kaso lamang ang gi-focusan. Human sa usa ka dekada nga buroka, 28 sa mga akusado ang gikombikto sa 57 ka ihap sa murder, ug 15 ang gikombikto isip accessory sa murder.

Sa iyang desisyon, gigrupo ni Judge Reyes ngadto sa unom ang mga akusado.

Ang unang pundok kadtong dunay kahibalo sa plano sa masaker ug mipabuto batok sa mga biktima didto sa Sitio Masalay. Gikombikto sila isip principals.

Ang ikaduhang pundok kadtong adunay kahibalo sa plano sa masaker ug may gihimo nga overt act apan dili didto sa Sitio Masalay. Gikombikto usab sila isip principals.

Ang ikatulong pundok kadtong adunay kahibalo sa plano sa masaker apan walay gihimong overt act. Gi-acquit sila.

Ang ikaupat nga pundok kadtong walay kahibalo sa plano sa masaker apan mipabuto didto sa Sitio Masalay. Gikombikto usab sila isip principals.

Ang ikalima nga pundok kadtong walay kahibalo sa plano sa masaker ug wala mopabuto didto sa Sitio Masalay apan positively identified sa mga testigo nga mihimo og overt act. Gikombikto sila isip accessory sa murder (ubos og duha ka degree ang silot).

Ang ikaunom nga pundok kadtong walay kahibalo sa plano sa masaker ug wala gali ma-positively identified. Acquitted sila.

Ang tanan na-acquit sa ika-58 nga murder charge (pagpatay kang Reynaldo Momay) kay matod sa huwes walay ebidensya nga usa si Reynaldo Momay sa napatay sa maong masaker, bisan pa man nga ang apapangig ni Momay na-identify.

Ang 761 ka panid nga desisyon ni Judge Solis usa ka enlightening ug educating read. Ang akong sugyot sa tanang estudyante sa balaod ug mahiligon sa balaod nga i-download kini sa Supreme Court website.

Kon ang Third Amended Informations maoy basehan ug nadesisyonan pa ni sa wala pa ang People v. Rolando Solar, G.R. No. 225595, Agosto 6, 2019, homicide ra gyod unta ang mahimong conviction sa mga akusado kay wala gi-specify sa Information ang ultimate facts sa qualifying circumstances. Apan nausab na kini nga jurisprudence.

Sa ako usab nga opinyon, bisan kon wala gi-convict ang pipila ka akusado sa pagpatay kang Momar tungod sa failure to prove beyond reasonable doubt nga apil sa namatay si Momar, mahimo gihapon nga mo-award og civil damages ang korte kay duna nay preponderance of evidence nga napatay gyod si Momar.

Sa laing bahin, sa akong tan-aw, gi-acquit unta si Bong Andal, ang driver sa backhoe, kay given sa gahom sa mga Ampatuan niadtong panahona, wala siyay laing kapilian kon dili ang pagtuman sa sugo sa mga Ampatuan sa paglubong sa mga namatay.

Pero mao lagi na, usahay ang dagway sa hustisya nga atong gitinguha dili mao ang hustisya nga motungha. Apan sa gihapon, justice has been served.

Alang sa inyong mga pangutanang legal, text sa 0916-664-7624.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.