Brigada Balaod

ETEEAP

Ang Expanded Tertiary Education Equivalency and Accreditation Program (ETEEAP) usa ka programa sa Commission on Higher Education (CHED) nga naghatag og kahigayonan niadtong mga gradwado sa hayskol ug nagtrabaho sulod sa lima ka tuig sa usa ka natad o industriya nga may kalabotan sa akademikanhong programa diin iyang gi-applyan ang equivalency.

Ang ETEEAP gimugna pinaagi sa Executive Order No. 330 niadtong Mayo 10, 1996 ni kanhi Pres. Fidel V. Ramos. Tataw kaayo ang Section 2(a) sa maong EO sa pagmandar sa CHED nga i-certify, human sa makuti nga pag-evaluate, “the pertinent work experiences and knowledge of expertise acquired by individuals from high-level, non-formal and informal training toward the awarding of an appropriate academic degree”.

Sa ato pa, ang angay unta nga matugahan og degri pinaagi niining ETEEAP kadtong mga tawo nga actual nga nagtrabaho sa usa ka natad o industriya. Pananglitan, naa nagtrabaho sa mantalaan apan walay degri sa journalism. O sa political survey firms sama sa Pulse Asia ug Social Weather Stations apan walay degri sa political science. Personal ko nga kaila, library assistant sa dugayng panahon, ug nakakuha og degri sa library science (mipasar pa gyod sa board examination).

Ning bag-o pa lang, mitingkag ang dalunggan sa ubay-ubay pong mga netizens sa balita nga si Sen. Manny Pacquiao gitugahan og degri nga political science gikan sa University of Makati. Matod pa, ang iyang eksperyansya isip usa ka magbabalaod sa Ubos Balay-Balaoranan ug karon isip Senador maoy basehan nganong gitagaan siya og degri sa political science. Kining maong punto angayng klarohon sa CHED – unsa ba gyoy definition sa “pertinent work experiences”. Sa ako lang personal nga opinyon, ang pagkamagbabalaod dili “pertinent work experience” kon political science ang atong hisgotan, kay ang political science mas langyab pa kaayo kompara sa paghimo og balaod.

Ang lain pa gyong isyu niini mao nga niadto lamang Pebrero 2019 gihatagan ang Senador ug high school diploma, pinaagi usab sa equivalency.

Tingali angayng klarohon sa CHED kon ang pag-ihap ba sa lima ka tuig nga “pertinent work experiences” magsugod sa panahon nga nagtrabaho ang usa ka ETEEAP applicant sa maong natad o industriya, o didto lamang sa panahon nga duna na siyay high school diploma.

Alang sa inyong mga pangutanang legal, text sa 0916-664-7614.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.