Brigada Balaod

Tricycles sa highway

Daghan kaayo kitang makit-ang mga tricycle nga nagdagan-dagan sa atong mga highway. Apan kon estriktohon gyod pag-implementar ang balaod, wala unta kini katungod ang mga tricycle nga moagi sa highways.

Ang Section 447(a)(3)(vi) sa Republic Act No. 7160 kun Local Government Code nag-ingon nga ang usa sa mga gahom sa Sangguniang Bayan (Municipal Council) mao ang pag-regulate sa mga tricycle ug ang paghatag og prangkisa nila pinasubay sa mga guideline sa Department of Transportation and Communication (karon Department of Transportation kun DoTr na lang). Ang Section 458(a)(3)(vi) sa mao gihapong balaod ang naghatag sa samang gahom ngadto sa mga Sangguniang Panlungsod o City Council.

Ang mga guideline sa DoTr nagkanayon nga gidili ang mga tricycle sa mga national highway nga gigamit sa mga sakyanan nga upat o daghan pa ang ligid nga may gibug-aton nga upat ka tonelada o sobra pa ug diin ang normal nga gikusgon sa dagan molapas og 40 kilometro matag oras. Kon walay alternatibo nga agianan (pananglitan walay laing ruta gawas sa highway), mahimo kining tugtan sa local government unit (LGU) pinaagi sa usa ka ordinansa.

Ang maong mga guidelines sa DoTr gi-reiterate sa Department of Interior and Local Government (DILG) sa Memorandum Circular Nos. 2007-07 ug 2011-68.

Apan hangtod karon, daghan pa kaayong mga LGU nga wala makatuman niini, ug padayong gitugtan ang mga tricycle nga moagi sa national highways in violation sa DoTr guidelines.

May mga moingon nga samok baya sa highway kining mga tricycle, apan sa pikas bahin pod, panginabuhi man pod na ang ilaha.

Niadtong miagong Kongreso, si Rep. Evelina G. Escudero misumiter sa House Bill No. 279 nga nag-criminalize unta sa pagdagan sa mga tricycle sa highways, apan wala mahimong balaod ang maong balaodon. (Maayo ra sab, sa opinyon ko.)

Hinuon ang balaod tataw kaayo nga may paagi unta nga mahimo kining legal – pinaagi sa pagpanday og ordinansa sa local council. Kay sa ngalang ang LGU maoy nakahibalo gayod sa sitwasyon nila sa lungsod o dakbayan, masabotan unta og asa ug diin ang mga tricycle mahimong paagion.

Kamo unsay inyong opinyon niini? Mas maayo kaha nga completely i-prohibit na lang gyod sa national highways ang mga tricycle?

Alang sa inyong mga pangutanang legal, mahimo kamong mo-text sa 0916-664-7624.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.