Brigada Balaod

Desisyon nga di na mag-notario publico

Sa mga bag-ong abogado, usa sa makasapar-sapar sa pagpanginabuhi mao ang pagka-notario publico.

Halos man god tanang transaksyon karon, magkinahanglan og mga dokumento nga angay notaryohan. Bisan ang labing simple nga kontrata ipaagi og notaryo. Daghang requirements usab nga angay isumiter sa kagamhanan, ipaagi gyod og notaryo. Sa ato pa, daghan gyong nangita og serbisyo sa notario publico, maong sa bag-ong abogado, nga wala pa kaayoy kliyente, usa pod ni nga makatabang-tabang nga dunay gamayng kita.

Sa kapin lima ka tuig nako nga pagpangabogar, tulo na pod ka termino sa pagka notario publico ang akong natagamtaman, ubos sa commission sa Regional Trial Court sa Cebu City. (Sa una, apil pa ang San Fernando ug Carcar City.) Mi-apply ako sa tuig 2014 alang sa 2014-2015 term. Matag duha ka tuig ang renewal sa notarial commission, ug na-renew ko alang sa 2016-2017, ug 2018-2019. Karong December 31, 2019, maupos ang akong ikatulong commission.

Akong nadesisyonan nga dili na magpa-renew sa notarial commission. Kini tungod sa nagkakuti nga compliance checking sa notarial section sa RTC Cebu City, nga alang kanako husto ra usab. Apan dili lang gyod nako magukod ang mga requirement sama sa pagsumiter sa certified true copy sa akong notarial register sa dili pa mapupos ang ikanapulo nga adlaw sa mosunod nga buwan.

Maayo man god sa una nga gamay pa kog practice, kay ako ra man poy magkalingaw og sulat sa mga entry sa notarial register. Maong magukod sa di pa maabot ang deadline. Apan karon nga kaluoy sa Ginoo ubay-ubay na pod tag kliyente (apan dili pa pod ingon ka daghan nga ma-justify ang kaugalingong secretary – may mga secretary mi sa law office, apan komon sila ta tanang manlalaban), dili na lang gyod ma-justify nga ipadayon pa nako ang pag-maintain og notarial commission.

Ang resulta lang gyod niini mao nga ang akong mga kliyente kinahanglang moadto og laing abogado alang sa pagpanotaryo sa ilang dokumento. May usa usab ako ka retainer client (magbayad matag bulan) nga ang pagnotaryo lang sa ilang dokumento ang akong trabaho (lahi ang ilang retainer lawyer sa mga kaso) ug busa kinahanglan silang mobalhin og lain.

Maong sa atong mga magbabasa nga mo-text og mahimo ba magpanotaryo, dili na sugod sa Enero 1, 2020.

Alang sa inyong mga pangutanang legal, mahimo kamong mo-text sa 0916-664-7624.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.