Brigada Balaod

Mga bantayanan kon mopalit og yuta

Kinsa ba goy dili ganahan makaangkon og yuta? Matod pa, ang Ginoo wala na maghimog yuta, maong kon ang usa ka parsela sa yuta gibaligya sa maabot nga presyo, angayan nga kini paliton.

Apan ang problema karon, daghan kaayong pangilad sa pagbaligya og yuta. Ania ang pipila ka bantayanan kon mopalit og yuta.

Una sa tanan, ang palit sa yuta binase gayod sa dokumento – bisan pag gihuptan nimo ang yuta, gibutangan nimog balay, o gipuy-an og pila na ka tuig, kon ang titulo niini tua sa ngalan sa laing tawo, mapapahawa gyod ka.

May duha ka klase sa yuta sa Pilipinas, depende kon maangkon ba kini sa pribadong interes o dili. Ang mga alienable and disposable lands (A & D), mahimong mapalit ug mabaligya ug mabalhin ngadto sa lain-laing mga tawo. Sama gayod kini sa kabtangan. Apan may mga yuta nga dili A & D. Daghan ni silang klase, apan alang sa katuyoan ning maong artikulo, silang tanan ang komon mao nga ang katungod lamang ang imong mabaligya, dili ang yuta mismo. Sagad usab kanila, mahimong kuhaon og balik sa kagamhanan kay dili sila mahimong titulohan.

Ang labing maayo mao kadtong mga yuta nga titled na. Duna nay titulo. Apan mas daghan ang yuta nga walay titulo, ug tax declaration lamang ang ikapakitang semblance of ownership sa naghupot. Kining tax declaration dili man god ni proof of ownership. Nagpakita lang siya nga ikaw maoy nagbayad sa buhis. Bisan kon tan-awon pa nimo ang ubos nga bahin sa usa ka tax declaration. Naa gyod diha nga “not proof of ownership.” Hinuon, kon ikaw ang nagpuyo sa yuta, ug ang tax declaration naa sa imong ngalan, may dakong purohan nga tuohan sa korte nga ikaw ang tag-iya sa yuta.

Dili pod tanan nga dunay tax declaration A & D ug mabaligya/mapalit. Ang uban man gong local government unit, labi na sa una, way pagpakabana kon ang gi-declare sa mi-claim og ownership subject to private disposition ba. Basta lang makakolekta og buhis.

Human matan-aw ang titulo o tax declaration, klaroha kon ang misuway og baligya nimo duna bay special power of attorney gikan sa tawo nga ginganlan sa titulo o tax declaration. Daghang namaligya karon nga dili pa diay ila ang yuta, duna lang silay porsyon niini.

Alang sa inyong mga pangutanang legal, mahimo kamong mo-text sa 0916-664-7624.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.