Brigada Balaod

Body cam sa mga pulis

Ang usa sa konkretong suhestiyon ni Vice President Leni Robredo ning iyang pagkatudlo isip co-chair sa Inter-Agency Committee on Anti-Illegal Drugs (ICAD) mao ang pagsul-ob og body camera sa mga pulis panahon sa mga anti-illegal drugs operations.

Maayo kini nga suhestiyon. Isip usa ka defense lawyer, daghan na kitag naestorya nga mga akusado ug daghan ang mitug-an nga gitanom lamang gayod kanila ang nakuha nga drugas. Ang pagsul-ob unyag body camera sa mga pulis makakunhod kon di man makapitol ning maong mga buhat.

Of course, double-sided pod ning body cam. Kay kon walay video, makahimog creative interpretation ang abogado sa unsa gyoy nahitabo. Apan ang video di gyod mamakak. Bisag unsaog depensa sa abogado, kon nakita gyod ang buy-bust diha sa video, piit gyod ang kliyente.

Sa ubang nasod, routine lamang gayod nga dunay body cameras ang mga pulis.

Sa Estados Unidos, ang 41 sa 100 sa labing dagkong dakbayan nag-require og body cam sa ilang mga pulis. Wala hinuoy national law ang U.S. kabahin sa pag-require og body cam sa mga pulis.

Sa Tsina, labaw sa 2 ka milyon ka mga pulis ang gipagamit og body cams. Ang Denmark migamit na niini niadto pang 2007. Sa Finland gisugdan kini niadtong 2015; sa France ug Germany niadto pang 2013. Hinuon didto sa Sweden, ang ilang kagamhanan miingon nga dili mahimong standard equipment ang body cameras; sa pipila lamang kini ka sitwasyon gamiton.

Ang mga impact study nagpakita nga positibo ang paggamit sa body cam. Ang mga pulis nga naggamit sa body cam mas ubos og nadawat nga reklamo kay sa niadtong wala maggamit. Ang mga pagtuon nagpakita usab nga may initial resistance lang ang mga pulis sa paggamit og body cam, apan kon masugdan na, mas mogamit sila niini.

Hinaot nga kining maong suhestiyon ni VP Leni suportahan og usa ka balaod nga mag-require na gyod niini. Otherwise, mawala ra usab unya kini.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.