Brigada Balaod

Bandalismo alang sa kawsa

Niadtong Martes, November 12, 2019, nabalita ang pagpangsulat og street graffiti sa lain-laing bahin sa Manila. Ang maong mga grafitti, nga sinulat gamit ang pula nga pintal, nanawagan sa pagpaubos sa presyo sa mga palaliton ug pagdako sa inadlawng suholan. Lakip sa na-vandalize mao ang Lagusnilad, ang underpass nga nagsumpay sa Intramuros ug sa City Hall sa Manila. Ang Lagusnilad bag-o lang gilimpyohan ug gipintalan.

Ang grupong Panday Sining miangkon sa maong paghugaw-hugaw sa maong mga dapit, apan mi-justify niini sa pag-ingon nga ang espasyo alang sa malinawon ug demokratikanhong pagpamulong nakompromiso na sa rehimen nga nag-criminalize sa dissent kun pagsupak. “Repression is rampant amid worsening poverty, joblessness, and hunger brought about by the Duterte regime’s adherence to foreign, big businesses, and landlord interests,” matod nila.

Kahinumdoman nga duna poy susamang mga lihok dinhi sa Dakbayan sa Sugbo sa una, diin ang pipila ka mga pundok mopintal sa island sa Jones Ave. og mga teksto pagsaway sa kagamhanan.

Wala kitay nasodnong balaod nga specifically nagsilot sa vandalism. Ang labing duol nga krimen mao ang Malicious Mischief nga gisilotan ubos sa Article 327 ug 329 sa Revised Penal Code.

Ang Article 327 sa Revised Penal Code nagkanayon, “Any person who shall deliberately cause to the property of another any damage not falling within the terms of the next preceding chapter, shall be guilty of malicious mischief.” Ang “next preceding chapter” nga gipasabot mao ang arson (pagsunog) ug susamang pagdagasang.

Ubos sa Article 329, nga giamyendahan na sa Republic Act No. 10951, ang silot sa Malicious Mischief depende sa damage nga nahimo: kon labaw sa P200,000, arresto mayor medium ug maximum (2 ka bulan ug 1 ka adlaw ngadto sa unom ka bulan nga pagkabilanggo); P40,000-P200,000, arresto mayor minimum ug medium (1 ka bulan ug 1 ka adlaw ngadto sa 4 ka bulan); ubos sa P40,000, arresto menor (1-30 ka adlaw nga pagkabilanggo) o multa nga di mokubos sa bili sa butang nga giguba ngadto sa P40,000.

Ang Panday Sining mi-justify sa maong graffiti isip art protest, apan wala kitay nakita nga “arte” sa maong hugaw-hugaw. Nagpasamot lang nga na-alienate ang mga Pilipino sa mga aktibista ang maong hugaw-hugaw.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.