Brigada Balaod

Salt tax

Usa sa mga gisugyot nga balaod sa atong Department of Health (DOH) mao ang pag-impose og buhis sa asin. Kini tungod kay nakita sa DOH nga ang kusog nga paggamit sa asin sa mga Pilipino usa sa hinungdan nga taas kaayo ang lebel nato sa mga sakit sama sa high blood pressure, problema sa kasingkasing, ug sakit sa kidney.

Pinasubay sa World Health Organization (WHO) guidelines, angay unta nga less than 5 grams per day lang ang intake sa asin. Apan ang mga Pilipino mo-average og 11 to 15 grams per day.

Hinuon, as of writing, wala pay representante sa Kongreso nga mi-sponsor sa maong balaodon.

Niadtong miaging Kongreso (2016-2019), gi-introduce ni Kong. Scott Davies S. Lanete sa Third District of Masbate ang pag-amyendar sa Section 151 sa National Internal Revenue Code, aron ipuno ang usa ka subsection niini nga magpataw og P1 nga buhis per milligram sa sodium chloride labaw sa one-third sa allowable daily intake nga girekomendar sa DOH. Kini si Lanete usa ka doktor. Wala mahimong balaod ang maong balaodon.

Sa kasaysayan, kining asin usa sa gibuhisan gyod sa mga kagamhanan, tungod sa rarity niini. Apan karon sayon na man lang kaayo ang pag-produce og asin, komon na kaayo kini og pipila na lamang ka nasod ang mipataw og buhis niini.

Hingpanlatawan nako nga dili gyod kini molusot isip balaod. Kini tungod sa kalisod sa mekanismo pag-implementar niini. Sa suhestiyon ni Kong. Lanete sa miaging Kongreso, ang manufactured goods ang patawan, sa ato pa, makontrolar sa gobyerno, kay naa man nay mga planta ang manufacturer. Apan ang grabeng salt intake sa mga Pilipino dili man tungod anang mga processed salty food, kon dili kanang mapalit sa kamerkadohan sama sa kaling, bulad, tinabal, ginamos, tinap-anan ug uban pa. Unsaon man pag-estrikto og kolekta niana sa atong kagamhanan?

Daghang mi-react sa maong proposal, ug halos tanan negatibo. Apan may punto pod baya ang DOH sa maong sugyot. Isip government agency in-charge sa kahimsog sa atong panglawas, maayo pod nga ilang masugyot ang mga paagi aron makunhoran ang atong mga sakit-sakit tungod sa klase sa atong mga pagkaon. Apan lisod ang pagkolekta sa maong buhis, ug usahay, may mga solusyon nga dili sa balaod sa buhis ipaagi.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.