Brigada Balaod

Farm tourism

Karong adlawa ang unang adlaw sa gipahigayong 6th Philippine Farm Tourism Conference didto sa Marco Polo Hotel sa Dakbayan sa Sugbo. Ang maong event gi-organize sa International School of Sustainable Tourism, Cebu Alliance of Tour Operation Specialists Inc., Department of Tourism, Department of Agriculture, Department of Trade and Industry, Provincial Government of Cebu, ug City Government of Cebu.

Niadtong 2016, gipanday ang Farm Tourism Development Act of 2016, R.A. No. 10816. Pinaagi sa maong balaod, giila sa estado ang importansya sa panguma diha sa pagseguro nga duna kitay makaon, ug gawas pa, dakong bahin sa atong populasyon ang naa nagsalig sa panguma. Ang gitarget sa kagamhanan mao ang klase sa panguma nga dili makaguba sa kinaiyahan. Pinaagi sa maong balaod, gi-encourage sa gobyerno ang paglambo ug pag-ugmad sa farm tourism dinhi sa atong nasod.

Ang farm tourism mao ang pagpaadto og mga bisita sa mga dapit sa panguma alang production, educational, ug recreational nga mga katuyoan. Lakip sa langyab sa farm tourism ang fishery-based operations. Pinaagi sa farm tourism, gipaabot nga mas modako ang kita sa mga mag-uuma ug mangingisda kay duna na may extra income stream, pinaagi sa pulta sa mga bisita, pagpamaligya sa produkto sa uma/pangisda diretso ngadto sa bisita, ug pagpaabang og mga rooms o cottages.

Wala pa lamang gayod kaayo mailhi ang farm tourism sa Pilipinas. Gani, bisan kon 2014 pa ko naabogado, wala ko makasugat sa balaod nga nagsuporta niini hangtod nga gisugdan sa among pamilya ang usa ka farm tourism site sa lungsod sa Sogod, amihanang Sugbo. Apan ubay-ubay na ang mga resorts dinhi sa Sugbo nga may susamang konsepto, bisan kon dili farm resort ang ilang tawag sa ilang kaugalingon.

Pinaagi man god sa farm tourism ug sa farm resort, gawas nga mahatagan og lugar diin maka-relaks ang mga bisita, ma-expose pod sila sa reyalidad sa panguma, labi na karon nga ang Rice Tariffication Law nagduot gyod sa mga mag-uuma ngadto sa mas pagkunhod pa tungod sa pagsulod sa baratong bugas humay gikan sa ubang nasod.

Hinaot nga pinaagi unya sa expose sa mga farm resorts, makita sa kadaghanan ang kaimportante sa pagsuporta og progresibong panlantaw alang sa atong mga umahan.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.