Brigada Balaod

Cebu 600 Challenge (Part 2)

Niadtong miaging semana atong gihisgotan dinhi ning atong lindog ang Cebu 600 Challenge, usa ka endurance ride alang sa mga hilig og motorsiklo, tuyok sa tibuok Sugbo. Ang 600 tungod sa gitas-on sa ride nga moabot og 600 kilometros.

Ang screenshot sa atong artikulo niadtong adlawa nakadani og pipila ka komento gikan sa mga miyembro sa social media.

Sa usa ka bahin, dunay miuyon sa atong opinyon nga dili unta angay nga gitugtan ang maong event. Matod ni Noel Auxero, pwerteng kusoga nanagan sa mga motor, ug risgo kaayo. Nakapangutana siya nganong gitugtan kini. Si Bhoy Dueñas usab mitimang nga mora silag maoy tag-iya sa karsada. Si Angel Everett miingon, “They broke the rules, Attorney, not good.”

Si Angelo Gulfan misulat nga mga hawod sa karsada ang miapil sa challenge, ug dili hapit mopadaplin, morag sila ray kamao magmotor. Alang kang Emmanuel Espina, unsafe, samok ug walay pulos ang maong event. Si Gemma Inso mipahibawo kanato nga dunay nadam-agan nga tigulang sa usa ka nagmotor nga dili sakop sa challenge kay midali-dali kinig padaplin aron makalikay sa mga partisipante sa challenge. Midugang siya nga maayo unta og dili na mausab, kay siyay gikulbaan alang sa tanan.

Hinuon, duna usay didto sa pikas habig. Matod ni Melbourne Villares Campaña, usa ra bitaw kuno to ka adlaw. Iyang gikompara ang challenge sa Ironman. Sa iyang kaugalingong page, mi-post si  Campaña: “Mayta Sonod Tuig. EPA SIRADO JUD ANG TIBOOK DALAN sa CEBU haron malipay si  ATTY. para way koyaw. Total 12 hours raman na. PARA SEYP vah”. Didto sa iyang post, daghang mi-comment nga akong gi-assume mga riders usab, apan napulos lang ad hominem ang atake. “Isalute u atty..kah maka follow jud ka sa traffic rules and speed limit all the time..” matod ni Kristian Ayees Mata. “PINAMAY ni attorney ha” matod ni Eliezer Ateñedo Langbid. “Suyaon. D kablo mo motor na bro. Kaila ko ani na lawyer mao n cgeg rally” matod sa usa ka account nga nagtakoban sa ngalang “Thumbang Preso Patid Lata”, nga sa iyang mga picture mailhan nga usa ka police officer Abao. “paligis paka atty. Hahahaha” matod ni Reymard John Miranda.

Apan wala gyoy bisan usa nga nakahatag og legal reasoning nganong na-suspend ang traffic rules alang sa mga partisipante sa maong challenge. Wala koy problema nga sawayon ang akong opinyon; kabahin kana sa free market of ideas nga isig saway kitas opinyon, aron molugwa ang labing maayo. Apan gikinahanglan usab tingali nga ang atong opinion binase sa balaod.

1 thought on “Cebu 600 Challenge (Part 2)”

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.